S.E Vise-Ministru ba Asuntu Parlamentares Sr. Adérito Hugo da Costa, partisipa iha sesaun plenária ne’ebé dirize husi S.E Prezidente Parlamento Nasionál Sra. Maria Fernanda Lay no marka prezensa maximu husi deputadu VI legislatura sira.
Diskusaun refere realiza iha loron 01/07/2024, no iha sesaun ne’e rasik bankada opozisaun tolu (3) hanesan partidu Fretilin, PLP no Khunto iha parlamento nasionál, husu ba governo, atu tau atensaun ba problema edukasaun ligadu rekrutamentu ba profesores sira “husu ba Ministeriu Edukasaun atu aselera lalais rekrutamentu profesores, inklui problema infra-estrutura iha rai laran no mós problema saúde, no mós preokupasaun husi populasaun sira husi RAEOA, iha area sosial, infra-estrutura, agrikultura, edukasaun no saúde”.
Nune’e S.E VMAP halo intervensaun hodi hateten katak, “IX governo nia planu durante tinan 5 nia laran sei kompleta programa ne’ebé IX governo iha, no agradese ba kritika konstrutivu husi bankada opozisaun sira, no governo garantia laiha tipu ba violasaun kona-ba rekrutamentu profesores sira”. Iha fatin hanesan S.E VMAP mós hateten katak kestaun sira seluk ne’ebé deputadu sira hato’o durante plenária ne’e VMAP sei dirije karta ba ministeriu kompetente hodi bele mai hatan ba deputadu sira iha plenária.
Iha fatin hanesan Parlamentu Nasionál mós halo diskusaun no aprovasaun ba jeneralidade projetu lei N.6/VI (1a)- kona-ba mandatu titulares no membru orgaun designadu Parlamentu Nasionál, ho votus 39- a favór, 4-kontra no 2- abstensaun.
Aleinde ne’e votasaun ne’e, kontinua kedas ho votasaun ba autorizasaun atu hatun hikas Projetu lei ne’e ba Komisaun A, hodi halo diskusaun, ho votus 42 a favor, 1 kontra no 2 abstensaun.
Ikusliu deputadus sira mós la haluha kongratula autór ne’ebé tau ona lian ofisial Tetun iha tradusaun google ka Google Translate.
