Tersa-feira loron, 02/07/2024, S.E Vise-Ministru ba Asuntus Parlamentares Sr. Adérito Hugo da Costa hamutuk ho CHEGA!.I.P., akompaña membru na’in neen hosi Konsellu Konsultivu Internasionál ho sigla ingles (IAC), hodi hasoru malu ho S.E Primeiru-Ministru, Sr. Kay Rala Xanana Gusmão.
Objetivu husi enkontru refere hodi relata servisu ne’ebé mak durante Konsellu Konsultivu Internasioná (IAC) implementa no inklui relata mós programa ka servisu hirak ne’ebé sei implementa iha tinan tolu tolu (3) oin mai tuir instrusaun husi Primeiru-Ministru nian.
Konsellu Konsultivu Internasionál (IAC), ne’e rasik kria hodi apoiu servisu Centro Nasionál Chega!I.P.(CNC) hodi prezerva Timor-Leste nia istoria no prosesu rekonsiliasaun. Audensia ne’e hala’o iha salaun fronteira maritima, Palacio Governo, Dili.
Diretor Ezekútivu CHEGA!.I.P. Sr. Hugo Maria Fernandes, iha entrevista realsa, “IAC diretamente hili hosi S.E Primeiru-Ministru, no ohin loron sira hasoru malu ofisialmente atu hato’o servisu saida mak durante ne’e sira halo no atu rona diretamente husi S.E. Primeiru-Ministru saida mak atu halo ba tinan tolu oin mai”.
Entretantu membru ba Konsellu Konsultivu Internasionál, (International Advisory Council-IAC) mak hanesan: Gus Miclat (Filipina), Nisay Hang (Camboja), Akihisa Matsuno ( Japão), David Webster ( Kanada), Marisa Ramos ( Portugal) no Ting Hooi ( Malazia), ba mandatu tinan tolu (3).