Dili, 16 Setembro 2024 (Media_VMAP) –Prezidente Repúblika, José Ramos Horta, reitera ninia kompromisu atu kontinua servisu hamutuk ho Governu, Parlamentu Nasionál no Órgaun Administrasaun Judisiál atu responde povu ninia hakarak.
Xefe Estadu hato’o deklarasaun ne’e wainhira hato’o diskursu iha Uma Fukun Parlamentu Nasionál, iha Sesaun Solene Abertura Segunda Sesaun Lejislativa iha VI Lejislatura, Segunda-feira, loron 16, fulan-Setembru, tinan 2024.
José Ramos Horta hatete futuru Timor-Leste nian depende ba kompromisu koletivu atu promove polítika sira ne’ebé garante dezenvolvimentu inkluzivu, sustentável no refleta valór sira ne’ebé define Timor-Leste nuda’ar nasaun ida.
“Nu’udar ita hahú sesaun lejislativa ida tan, ha’u reitera ha’u-nia kompromisu atu kontinua servisu hamutuk ho Governu, Parlamentu Nasionál no Órgaun sira AdministrasaunJjustisa nian, hodi hatán ba ita-nia povu nia hakarak. Futuru Timor-Leste nian depende ba ita-nia kompromisu koletivu atu promove polítika sira ne’ebé garante dezenvolvimentu inkluzivu, sustentável no ne’ebé refleta valór sira ne’ebé define ita nu’udar nasaun”.
Xefe Estadu akresenta iha limiár síklu lejislativu foun ne’e nia parte hakarak destaka pontu kursiál balun ne’ebé tenki orienta parte hotu ninia servisu hamutuk ne’ebé kontén pontu importante neen mak hanesan hametin instituisaun demokrátika sira, dezenvolvimentu ekonómiku sustentável, integrasaun rejionál no internasionál, koezasaun sosiál no hametin tesidu komunidade nian, promove paz no seguransa no diálogu permanente ho sosiedade sivil.
Antes taka diskursu, Prezidente Repúblika afirma Parte hotu sei kontinua la’o hamutuk, metin iha objetivu atu harii nasaun ida ne’ebé prósperu, justu no solidáriu tanba povu merese moris di’ak no hamutuk bele transforma mehi kona-ba nasaun ida ne’ebé dezenvolvidu, inkluzivu no ekuitivu ba realidade.
“ Ita-nia istória maka istória ida kona-ba superasaun, aten berani no determinasaun, ita sei kontinua la’o hamutuk, metin iha objetivu atu harii nasaun ida ne’ebé prósperu, justu no solidáriu. Ita-nia povu merese ita-nia di’ak liu no hamutuk ita bele transforma mehi kona-ba nasaun ida ne’ebé dezenvolvidu liu, inkluzivu liu no ekuitativu liu ba realidade”.
Marka prezensa iha Sesaun Solene abertura Segunda Sesaun Lejislativa iha VI Lejislatura ne’e, membru órgaun lejislativu sira, Primeiru-Ministru, Xanana Gusmão, ho membru Governu sira, Prezidente Tribunál Rekursu, reprezentante korpu diplomátiku no konvidadu sira seluk.