S.E Vise-Ministru ba Asuntus Parlamentares Sr. Adérito Hugo da Costa selebra loron Nasional Liberdade Imprensa hamutuk ho Konsellu Imprensa iha postu Balibo, Munisípiu Bobonaro iha loron daruak 16/10/2024.
Bobonaro, 16 de Outubro 2024 – Selebrasaun loron Nasional Liberdade Imprensa ba daruak ne’e ho tema “Atmosfera Liberdade Imprensa iha Nasaun Demokrátiku”.
Liberdade imprensa, iha Timor-Leste, hetan garantia husi Konstituisaun, iha artigu nu. 40 – Liberdade espresaun no informasaun”, no nu. 41 – Liberdade imprensa no meiu komunikasaun sosiál nian sira”, signifika katak Timor-Leste moris iha hanesan Liberdade ida ne’ebé ema hotu bele hato’o opiniaun ka espresaun oioin livremente kompara ho tempu okupasaun no kolonializasaun.
Durante iha selebrasaun loron Nasional Liberdade Imprensa ba daruak ne’e S.E Vise-Ministru ba Asuntus Parlamentares hateten katak iha Balibo la’os hanoin trajedia “Balibo Five” de’it maibé nu’udar mós fatin ba lialos no liberdade.
“Iha Balibo ita la’os hanoin de’it trajedia sira iha pasadu, maibé reafirma mós ita-nia kompromisu ba futuru katak sempre iha fatin ba lialos no Liberdade”, dehan VMAP Sr. Adérito Hugo da Costa.
Iha fatin hanesan S.E VMAP hamutuk ho Konsellu Imprensa, reprezentante media no jornalista sira inklui konvidadu de onra sira tau mós aifunan no Sunu lilin ba iha fatin akontesimentu ne’ebé mak Jornalista estranjeiru nain lima (5) ne’ebé sakrifika-an, haris ran, mate tan kobertura kona-ba invazaun mai rai doben Timor-Leste iha tinan 1975.
Parabens ba Loron Nasional Liberdade Imprensa, mai ita tane as nafatin Liberdade Imprensa no Espresaun iha Timor-Leste.