Liquica, 17 de Outubro 2024 – Gabinete Asuntus Parlamentares ne’ebé tutela iha Vise-Ministru ba Asuntus Parlamentares kontinua akompaña semináriu Panorama Orsamentál tinan 2025 nian ne’ebé realiza iha Liquica loron 17/10/2024.
Objetivu husi semináriu ne’e hodi promove dialogu transparénsia no fahe mós informasaun kona-ba makro-ekonimia, halo analiza ba Planu Asaun sira ne’ebé iha relasaun ho programa IX Governo Konstitusional nian.
Semináriu daruak ne’e nu’udar semináriu ikus ba Panorama Orsamentál 2025 nian, nune’e Sekretária Meza Parlamentu Nacional Virgínia Ana Belo reprezenta Prezidente Parlamentu Nacional hato’o agradesimentu ba panelista ka aprezentador sira husi Governu, parseiru sira no sosiedade civil, ne’ebé mak apresenta no fó hanoin kritiku no konstrutivu durante semináriu panorama orsamentál 2025.
“Laiha liafuan seluk atu hato’o maibé lori Parlamentu Nacional nia naran hakarak hato’o agradesimentu ba aprezentador sira, ami espera katak ho hanoin no kritiku sira ne’ebé mai husi entidades hotu bele aumenta liu tan Parlamentu Nacional nia kapasidade, atu analisa proposta orsamentu 2025, hodi debate ho hanoin diak no ulun malirin”. Hateten Virginha Ana Belo.
Sekretária Meza PBN ne’e hatutan liután katak, iha parte balun Parlamentu tenke konsidera liuliu atu kuidadu ho gastus nesesariu sira ne’ebé iha tanba ne’e agradese tebes ba hanoin diak sira, tamba ne’e husu Deputadu sira atu tau iha konsiderasaun, wainhira iha audensia bele fó moos hanoin ba Membru Governu sira, nesecidade sira ne’ebé la nesesariu para atu aloka talves ita bele halo kortes ruma iha parte balun.
Aleinde ne’e semináriu Panorama Orsamentál 2025 ne’e nu’udar dalan pozitivu atu Parlamentu nacional no Deputadu sira halo diskusaun kle’an, no detallu ho Membru Governu sira molok tama ba diskusaun Audensia Públika no seluk tan.
Entretantu oradór sira iha semináriu durante loron rua ne’e maka hanesan, Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente em ezersisiu, Ministru Planeamentu Investimentu Estragiku em ezersisiu, Sr. Miguel Mantelo, Ministra Finansa em ezersisiu, Sra. Felicia Carvalho, Ministru Administrasaun Estatál (MAE), Sr. Tomas Cabral, Governadór Banku Sentrál Timor-Leste, Sr. Helder Lopes no reprezentante husi Programa Nações Unidas e Desenvolvimento (PNUD), Army Lamestiev, Primeiru-Ministru em ezersisiu no Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária Sr. Mariano Assanami Sabino, Prezidente Tribunal Rekursu Sr. Deolindo dos Santos, Prezidente Autoridade da Região Administrativa Especial de Oe-Cusse Ambeno em ezersisiu no Koordenador Zona Ekonomia Espesial Dezemvolvimentu Oé-cusse Ambeno (ZEEDOA) Sr. João Mendes Gonçalves, no UN WOMEN.