Dili, 22 Outubro 2024 – EDTL, E.P hato’o pedidu ba Komisaun E Parlamentu Nasionál hodi husu orsamentu adisionál $22,000.000 iha OJE 2025. Orsamentu refere aloka ba kategória Bens no Servisu, atu uza ba rekrutamentu asisténte tékniku kada Suku nian, liuhusi Audénsia públika ho Komisaun E PN iha eis salaun Ministeriu Finansas, loron 21 fulan-Outubru Tinan 2024.
EDTL, E.P ninia Proposta OJE ba 2025 maka $26,898.891,172 no tuir Prezidénte EDTL, E.P Señor Paulo da Silva katak, EDTL, E.P ninia proposta ba OJE 2025 ne’e mantein hanesan ho OJE 2024 ho montante $26,898.891.172, maibé Komisaun Revizaun Orsamentu – CROP, redus tiha ba $25,808.306.357, tanba ne’e EDTL, E.P presiza orsamentu adisionál $22,000.000 ba rekrutamentu asisténte tekniku kada Suku ne’ebé mak ninia prosesu la’o tiha ona fulan rua ka tolu liu ba.
OJE 2025 EDTL, E.P laiha alokasaun orsamentu ba tranferénsia públika iha tinan 2025, Programa prioridade ne’ebé mak EDTL, E.P sei implementa iha 2025 mak Fortalesimentu Institusionál, Kualidade fornesimentu enerjia elektrika, Hasae Reseita sira, Dezenvolvimentu Infraestrutura, Estudu Viabilidade, Servisu Operasionál no Manutensaun.
Ezekusaun orsamentu EDTL, E.P to’o mai iha fulan-Outubru tinan 2024 hamutuk 95.9%, ho nia detalliu ezekusaun, Saláriu no Vensimentu 77.0%, Bens no Servisu 97.6%, Kapitál Menór 94.3% no Kapitál Dezenvolvimentu 94.7%, laiha alokasaun orsamentu ba transferénsia públika iha tinan 2024. Aleinde ne’e EDTL,E.P mós kolleta ona reseita sira iha fulan-Janeiru to’o Setembru hamutuk $42,231,159.64
Audénsia públika ne’e prezide husi Prezidente Komisaun E PN, Deputadu Marcos Xavier no partisipasaun husi Deputadu/a Membru Komisaun E no prezensa husi Prezidente EDTL, E.P, Paulo da Silva, Diretór no tékniku sira.