Loron 23 fulan-Outubru, liuhusi Audénsia Públika Exelénsia Gil da Costa Monteiro “Oan Soru” aprezenta Programa no Orsamentu OJE 2025 ba deputadu/a sira iha Audénsia Públika ba komisaun F trata assuntu Saúde, Seguransa Sosál no Igualdade Jeneru Parlamentu Nasionál.
Ministériu Assuntu Kombatente Libertasaun Nasionál – MAKLN, preve ninia orsamentu ba tinan 2025 ho totál montante $207.069.136 hodi kobre ba programa rua (2) mak Funsionamentu no Dezenvolvimentu Institusionál ho montante $3,402.212 no Inkluzaun Sosiál ho montante $203, 666.924. Orsamentu hirak ne’e fahe ba Saláriu no Vensimentu 1.787.636, Bens no Servisu $5.949.982, Transferénsia Públika $195.515.922, Kapitál Menor $76.000 no Kapitál Dezenvolvimentu $3.739.596.
MAKLN ninia Orsamentu OJE tinan 2024 ho montante totál $$113.010.076 no kompara ho OJE 2025, MAKLN iha aumentu $94.059.060 no ninia ezekusaun OJE 2024 iha portál transparénsia loron 23 fulan-Outubru atinji ona 81.2%.
OJE 2025 MAKLN laiha pedidu adisionál no nafatin lao ho forsa traballu hamutuk 308, ne’ebé mai hosi Funsionáriu permanente 50, Ajénte Administrasaun públiku 68, Funsionariu Kazuáis/kontratadu 145, Nomeasaun Politiku 33, Assesór Nasionál 10 no Assesór Internasionál 2.
Durante audénsia públiku entre deputadu/a sira iha Komisaun F, Exelénsia Ministru MAKLN hetan akompañamentu hosi Sekretáriu Estadu Veteranu, Kargu Diretór no Xefia sira nomós Asessór sira.