Prezidénte Tribunál Rekursu, S.E Deolindo dos Santos ho estrutura Tribunal sira halo audénsia públika ho Komisaun A trata asuntu Konstitusionál no Justisa Parlamentu Nasionál, iha 23 fulan-Outubru tinan 2024.
Prezidénte Tribunal Rekursu aprezenta programa no orsamentu OJE 2025 ba deputadu/a sira komisaun A ho Programa Aproxima Servisu Tribunál nian ba Populasaun, Asesu Justisa no Funsionamentu no Dezenvolvimentu Institusionál ho totál montante orsamentu US$4, 670.395.00.
Orsamentu OJE 2025 ne’ebé previstu hodi kobre ba Saláriu no Vensimentu $3.454.572 ne’ebé iha redusaun kompara ho OJE 2024 ho montante $3.924.650, Bens no Servisu $925.823 ne’ebé iha redusaun kompara ho OJE 2024 previstu $948.027.
Tribunál rekursu la aloka orsamentu ba kategoria Kapitál Menor, maibé hafoin aprezenta pedidu adisionál KRO aprova $290.000 hodi sosa mobiliáriu no instalasaun server, maibé parte balun liuliu rúbrika asisténsia téknika (asesoria) retira tiha husi orsamentu Tribunál nian no koloka fali ba Dotasaun Jerál Estadu, enkuantu Transferénsia no Kapitál Dezenvolvimentu la preve orsamentu iha OJE 2025.
Orsamentu Tribunal sira iha OJE 2024 ho montante $5, 579.943 no ninia ezekusaun iha portál transparénsia loron to’o 23 fulan-Outubru atinji ona 66.3%, bainhira halo komparasaun entre OJE 2024 ho OJE 2025 Tribunál sira hetan redusaun.