Komisaun A Parlamentu Nasionál ne’ebé trata asuntu Konstitusionál no Justisa halo audiénsia públika ho Prokuradoria Jerál Repúblika (PGR), iha Kinta-feira, loron 24, fulan-Outubro tinan 2024, iha sala konferénsia Parlamentu Nasionál.
Iha audiénsia públika ne’e, Prezidente Komisaun A, Deputadu Patrocínio Fernandes dos Reis, fó biban ba Prokuradór Jerál Repúblika, Meritísimu Alfonso Lopez, hodi aprezenta proposta OGE 2025 no progresu taxa ezekusaun orsamentu 2024 nian, antes loke oportunidade ba Deputadu sira Komisaun A nian hodi koloka kestaun sira liga ho OGE ne’ebé alokadu ba PGR iha tinan ne’e no tinan oin.
Iha aprezentasaun, Meritísimu Alfonso Lopez, hatete Proposta OGE ba 2025 ho montante $4.223.437,00 enkuantu OGE ne’ebé previstu ba tinan 2024 ho montante $3.842.631,00 maibé iha dotasaun inisiál ne’ebé aprovadu husi Parlamentu Nasionál ho montante $3.692.631,00, ho taxa ezekusaun iha portál transparénsia ba fulan-Outubru atinji ona 67.22% inklui komprimisu no obligasaun ne’ebé atinji ona 70%.
Proposta OGE ba 2025 ho montante $4.223.437,00 ne’e sei fahe ba kategoria Saláriu no Vensimentu ho montante $3.277.759,00, Bens no Servisu Korente $905.678,00, Kapitál Menor $40.000,00 enkuantu Transferénsia Públika no Kapitál Dezenvolvimentu la prevé orsamentu.
Wainhira Deputadu sira kestiona kona-ba totál orsamentu dotasaun inisiál ne’ebé la hanesan ho dotasaun finál ne’ebé aprezenta, PGR klarifika katak iha OGE 2024 la prevé orsamentu ba kategoria viajen estranjeiru tanba ne’e nia parte halo pedidu adisionál ho montante $150.000,00 hodi finansia fali viajen estranjeiru hodi partisipa eventu importante sira liga ho servisu prokuradoria nian.
Wainhira halo komparasaun entre OGE 2024 ho OGE 2025 maka OGE 2025 ba PGR iha aumentu tanba atu sosa kareta ba adjuntu prokuradór, pagamentu saláriu ba asesór internasionál no alterasaun saláriu ofisiál justisa nian inklui seluk tan.
PGR aprezenta duni pedidu adisionál ba Komisaun Revizaun Orsamentál CRO maibé montante ne’ebé aprova maka $40.000,00 ba kapitál menor ba konstrusaun edifísiu, mobiliáriu, kámara vijilánsia no instalasaun server iha munisípiu Manufahi.
Entretantu Asesu Justisa no Funsionamentu no Dezenvolvimentu Institusionál sai nafatin programa prioridade ba PGR ba tinan 2024 no 2025.
Marka Prezensa iha iha audiénsia públika ne’e Prokuradór Jerál Repúblika no dirijente máximu PGR sira