Vikeke, Loron 29 Fulan-Outubru, Komisaun A Trata assuntu Konstitusionál no Lejislativu ho Aútoridade Munisípiu Vikeke realiza sorumutu Sensibilizasaun Lei Kona-ba Rai no Uma (Bens Imóveis) ba Administradór Postu, Xefe suku, Diretór no Xefe Departamentu Munisipál sira nomós komunidade balun.
Objetivu hosi sensibilizasaun ida ne’e, hodi bele partilla informasaun no hetan idea balun nomós sujéstaun hosi aútoridade sira iha munisípiu no komunidade sira kona-ba Lei n.° 13/2017, rejime espesiál definisaun Titularidade ba Rai no Uma ninia relativamentu implementasaun.
Iha Sorumutu ida ne’e Prezidénte Aútoridade Munisípiu Vikeke – PAM, Señor Francisco Simões de Gonzaga Soares, liuhosi intervensaun hatete sorumutu ida ne’e espesiál tebes ba ami no ami iha esperansa boot ba ami nia munisípiu vikeke, bele hetan buat ruma pozitivu hosi ita nia sorumutu ohin loron ne’e, hodi nune’e prezidénte no membru deputadu sira komisaun A, bele husik hela buat ruma no solusaun ba problema rai no uma nian iha munisípiu ida ne’e.
Prezidénte Munisípiu Vikeke hateten katak “Iha munisípiu Vikeke, estadu laiha rai, iha mak rai privadu no rai adat/kultura nian mak iha,” ita hatene konstititusaun garanti katak sidadaun hothotu iha direitu ba rai pedasuk ida” maibé iha vikeke ne’e ema individu ida bele iha rai kuaze etáre ba etáre,” oinsa estadu atu dezenvolve rai ida, kuandu estadu laiha rai”. Ita ko’alia kona-ba dezenvolvimentu, Estadu tenke iha rai. Tanba ne’e ohin tempu to’o ona mai ita, atu rona informasaun hosi deputadu sira kona-ba Lei Rai no Uma.
Nune’e Prezidente Komisaun A, Deputadu Patrocínio Fernandes dos Reis iha nia introdusaun ba objetivu hosi sorumutu ida ne’e mak lori komisaun A nia naran hakarak hato’o obrigadu no agradese ba disponibilidade PAM no nia estrutura hotu, hodi mai dialógu iha sorumutu ida ne’e entre komisaun A ho Ita-Boot sira iha munisípiu Vikeke. “Komisaun A hakarak rona barak hosi Ita-Boot sira”, “tanba keixa no petisaun sira barak liu kona-ba konflitu ka disputa rai no uma nian entre estadu ho ema privadu sira nomós komunidade ho komunidade”.
Prezidénte hatutan liután katak “lei kuadru sira la sufisiente atu responde problema kona-ba disputa rai no uma”, “nune’e mak ita presiza rona hosi imi, atu nune’e bele lori ba Governu foti desizaun saida mak Governu bele halo, karik presiza lejislasaun ruma ka politíka balun hodi responde problema kona Rai no Uma”,
Iha biban ne’e mós Prezidénte Komisaun A fó tempu ba Deputadu Joaquim dos Santos “ Boroluli” no Deputadu António Verdial hanesan membru komisaun A, hodi aprezenta domíniu Rai no Uma (Bens Imovéis), tuir Lei N.° 1/2023, Lei N.° 19/2004 no Lei N.°13/2017, ne’ebé baze ba Konstituisaun RDTL nomós esplikasaun ba implementasaun Lei sira ne’e.
Hatan ba aprezentasaun sira ne’e Administradór Postu 5, Xefe Suku sira no komunidade sira balun hato’o sira nia preokupasaun no sujéstaun, liuliu problema kona-ba Rai no Uma, ne’ebé hato’o hosi Administradór Postu sira, katak presiza haree ba ordenamentu territorial ka kona-ba baliza rai ida ba rai ida no baze legal ka rezolusaun ne’ebé forti hodi rezolve problema Rai no Uma.
Sorin seluk Xefe Suku sira mós hatete katak, problema rai no uma, mai kedan hosi tinan 1999 depois referendum, komunidade hothotu okupa rai no uma estadu ne’ebé Indonézia husik hela no problema komunidade ho komunidade nomós diretu ba propriadade, tan ne’e Xefe suku sira husu ba Komisaun A atu bele tun ba baze hodi esplika kona-ba Lei n.° 13/2017, rejime espesiál definisaun Titularidade ba Rai no Uma ninia relativamentu implementasaun ba iha komunidade sira, Xefe suku sira mós sujere ba Komisaun A atu bele haree Dekretu-Lei n.º 9/2016, nune’e bele fó kompeténsia ba suku hodi rezolve problema rai no uma iha komunidade nia leet.
Sorumutu ne’e mós Diretór no Xefe Departamentu Teras no Propriedade no Servisu Kadastrais hato’o katak problema rai no uma ita kanaliza no uza Lei n.° 13/2017, maibé la fó dalan hodi halo deslokasaun forsada, tanba ne’e ita uza dalan sira hanesan prosesa legál ba iha Komisaun Teras no propriedade nian no Tribunál hodi rezolve. Aleinde ne’e hosi parte seguransa PNTL, Komandante Polisia Munisípiu Vikeke, fó ninia komentáriu katak, Timor oan tenke iha rai pedasuk ida hodi bele hala’o nia moris laos ema xineza ida, mai kaben ho ita nia maluk Timor oan ida, depois xineza ne’e tenke iha rai ne’ebé boot no luan.
Marka prezensa iha Sorumutu ne’e Mai husi Deputadu Sira iha komisaun A, Prezidénte Munisípiu Vikeke, Administrador postu no reprezentante postu Vikeke, Lakluta, Ossu, Uatulari, Uatukarbau no Xefe Suku sira no reprezentante suku 36 nomós komunidade balun, Diretór no Xefe Departamentu sira no funsionáriu sira iha Munisípiu Vikeke nomós funsionáriu tékniku sira hosi Parlamentu Nasionál no Gabinete Assuntu Parlamentár – GAP, VMAP.