Orsamentu ba Vise-Primeiru Ministru Área Ekonómika ho montante US$ 400.000 pasa iha debate OJE espesialidade 2025, iha Plenáriu Parlamentu Nasionál, loron 13, fulan-Outubru, tinan 2024, ho votu afavór 42, kontra 17 no abstensaun 3.
Antes tama ba votasaun ba orsamentu Vise-Primeiru Ministru Área Ekonómika nian, Deputadu sira aprezenta proposta alterasaun rua maka proposta númeru 13 no proposta númeru 43, maibé proposta númeru 13 hanesan ho proposta númeru 10 ne’ebé aprezenta ba Primeiru-Ministru, nune’e proposta ne’e prejudikadu tiha no la pasa iha votasaun ho votu afavór 21, kontra 41 no abstensaun 1.
Iha proposta númeru 13, proponente sira husu atu substitui fali orsamentu ho montante US$400.000 ne’ebé alokadu ba Gabinete Vise-Primeiru Ministru Área Ekonómika iha Programa Funsionamentu no Dezenvolvimentu Nasionál ba fali Programa Investimentu no Diversifikasaun Ekonómika iha Ministériu Koordenadór ba Asuntu Ekonómiku, ho razaun katak orsamentu ne’e ninia ezekusaun zero iha 2024.
Tuir proponente, Deputada Maria Angelina Sarmento, proposta substituisaun ne’e halo atu apoia inisiativa investimentu no diversifikasaun ekonómika atu estimula kresimentu ekonómiku ne’ebé fundamentál tebes ba Timor-Leste ne’ebé supera ninia dependénsia ba rekursu naturál no konstrui futuru ida ne’ebé prósperu no sustentável.
Enkuantu ba proposta númeru 43, proponente sira husu atu reduz orsamentu ho montante $190.742 husi totál $400.000 iha Programa Funsionamentu no Dezenvolvimentu Institusionál hodi aloka fali ba setór produtivu sira seluk ho razaun katak taxa ezekusaun tinan 2024 ba kategória ida ne’e zero no gabinete ne’e mós la eziste.
Relativamente ho proposta númeru 13 no 43, Vise-Primeiru-Mnistru Área Ekonómika, Señor Francisco Kalbuady Lay hatete orsamentu ho montante $400.000 ne’ebé alokadu ba kategória Bens no Servisu Korente la ezekuta, tanba nia parte simu de’it saláriu husi ministru Turizmu no Ambiente nian no Lei la fó dalan atu hetan tan vensimentu husi kargu Vise-Primeiru-Ministru nian.
Tuir Governante ne’e lei la fó dalan atu simu tán vensimentu ba kargu Vise-Primeiru-Ministru nian no dadaun ne’e servisu Vise-Primeiru Ministru nian akomuladu hamutuk ho Ministru Ámbiente no Turizmu, tanba ne’e laiha razaun atu gasta orsamentu ida ne’e.
Hafoin hetan explikasaun husi Vise-Primeiru-Mnistru Área Ekonómika, meza deside hakat ba votasaun ba proposta númeru 43 ho votu afavór 20, kontra 39 no abstensaun 3, nune’e proposta referida la pasa.
Iha diskusaun OJE 2025 ba Vise-Primeiru-Mnistru Área Ekonómika ne’e nafatin ho prezensa Primeiru-Ministru, Kay Rala Xanana Gusmão, II Vise-Primeru Ministru Assuntu Sosíais, Mariano Assanami Sabino, Ministru sira no membru Órgaun Ezekutivu sira hotu nmós akompaña mós husi audiénsia.