Parlamentu Nasionál aprova iha finál globál Orsamentu Jerál Estadu (OGE) ba 2025 ho valór totál konsolidadu dólar Amerikanu billiaun 2.6 ho votu afavór 42 kontra 23 no abstensaun 0, iha plenáriu, loron 20, fulan-Novembru, tinan 2024.
Husi totál US$ dólar Amerikanu billiaun 2.6 ne’e inklui dotasaun ho valór dólar billiaun 2.07 destinadu ba administrasaun sentrál, seguransa sosiál dólar milliaun 482 dólar milliaun 62 ba RAEOA.
Deputada Maria Angêlica Rangel liu hosi deklarasaun polítika hateten Bankada FRETILIN vota kontra tanba OGE 2025 Governu la hatudu esforsu no medidas foun ruma atu hetan fonte finanseira foun no kadoras minarai no greater sunrise ne’ebé promete iha kampaña no Primeiru-Ministru rasik konfirma katak la fásil atu dada mai Timor-Leste no ninia dezenvolvimentu rasik laiha serteza.
Membru Parlamentu Nasionál ne’e akresenta Governu presiza aprezenta polítika, programa no planu ne’ebé ho jestaun saudável ba aplikasaun fundu minarai nian nune’e bele fó tan tempu ba minarai atu labele hotu sedu antes tinan 2035 nune’e bele loke dalan ba Timor-Leste atu buka reseita finanseira foun ba Timor-Leste. Dalan konkretu ba reestrutura proposta orsamentu ida ne’e hodi haki’ik osan ba sustenta mákina Estadu, haboot osan ba investimentu iha saúde, edukasaun ba labarik no joven sira, nutrisaun ba labarik, uma ba povu kbi’it laek, bee moos no agrikultura, maibé partidu no líder sira iha Governu fiar an ho ego pesoál boot no la presiza ideia husi partidu FRETILIN.
Entretantu Deputadu Duarte Nunes liu hosi deklarasaun polítika hateten bankada CNRT vota afavór tanba orsamentu ne’e hanesan ran povu nian ne’ebé tenki aprova hodi hatutan povu-nia moris.
Bankada CNRT apresia IX Governu ne’ebé lideradu husi Primeiru-Ministru, Kay Rala Xanana Gusmão ne’ebé lori ona proposta OGE ba Parlamentu ne’ebé hatudu ona ninia kapasidade no autoridade hodi simu krítika sira ne’ebé ikus mai responde ba preokupasaun hotu ne’ebé deputadu sira koloka durante debate.
Orsamentu Jerál Estadu (OGE) Timor-Leste ba tinan 2025 ne’ebé ho lema “Investimentu iha Infraestrutura Estratéjika, Reforsu Ekonomia no Mellora Bem-Estar Povu nian” ne’e Governu pretende atu promove dezenvolvimentu sosioekonómiku nasaun nian liu hosi investimentu diresionadu ba infraestrutura estratéjika, fortalesimentu ekonómiku no inisiativa destinada ba hadi’a moris di’ak povu nian.
Ba Governu, Proposta Lei Nú 12/VI (2a) ne’e refleta estatéjia klara atu estimula kresimentu ekonómiku sustentável, mellora prestasaun servisu públiku no garante katak benefísiu sira husi dezenvolvimentu bele to’o ba sidadaun timorense hotu.
Normalmente Komisaun C ne’ebé trata asuntu finansa públika sei prosede redasaun finál ne’ebé sei haruka ba meza Parlamentu hodi submete ba Prezidente Repúblika ne’ebé iha kompeténsia eksluziva atu promulga ka veta ba lei OGE ida ne’e.
Tuir artigu 9.o, kapítulu IV, dispozisaun finál, husi Proposta Lei Nú 12/VI (2a), hafoin promulgasaun husi Prezidente Repúblika, lei ne’e tama iha vigór iha loron tuir mai hafoin publikasaun ne’ebé fó efeitu hahú loron 01, fulan-Janeiru 2025.