Parlamentu Nasional aprova ona orsamentu ba Ajensia Nasional Intelijensia (SNI) ba tinan 2025 iha reuniaun plenaria ne’ebé hala’o iha Segunda (18/11/24). Orsamentu ne’ebé aprova ho montante $2,642,443 fahe ba kategoria saláriu no vensimentu, bens no servisu, no kapitál Menor.
Debate espesialidade ne’e hahú ho leitura ba proponente sira nia proposta ne’ebé hato’o husi Sekretariadu Meza. Hafoin ne’e, Prezidente Parlamentu Nasionál, Fernanda Lay, fó oportunidade ba proponente sira atu fó esklaresimentu kona-ba proposta, ne’ebé mai hosi bankada opozisaun sira.
Sua Exelénsia Primeiru-Ministru, Kay Rala Primeiru-Ministru mós afirma katak governu tenke alerta liután ba aumentu krime organizadu no mafia internasionál sira ne’ebé iha poténsia atu fó perigu ba sosiedade sivíl.
Iha sesaun esklaresimentu, Deputadu Natalino dos Santos Nascimento esplika, proposta orsamentu ba kategoria 6 no 7 retira tiha ona, tanba orsamentu iha ona. Entertantu Deputada Lidia Norberta Dos Santos Martins hateten katak antes ne’e Vise-Prezidente Domingos Agusto “Deker” mos sujere retira husi proposta refere.
Proponente, Luis Roberto, hatutan tán katak hafoin rona Primeiru-Ministru nia esplikasaun kona-ba importánsia husi intelijénsia nasionál, nia deside atu retira proposta ne’e, konsidera katak orsamentu ne’ebé presiza tama tiha ona iha dotasaun ne’ebé aprova ona.
Orsamentu ne’ebé aloka ba SNI iha tinan 2025 kompostu husi Saláriu no Vensimentu: $1,094,967, Bens no Servisu: $1,224,976, Kapitál Menor: $322,500, Transferénsia Públika no Kapitál Dezenvolvimentu: 0
Hafoin aprezentadór retira nia proposta, meza reuniaun nian husu atu vota. Rezultadu hatudu apoiu tomak husi membru 44 ne’ebé marka prezensa, ho votu kontra 0 no abstensaun 20. Nune’e OJE SNI 2025 hetan aprovasaun.
Enkontru ne’e hetan partisipasaun husi Sua Exelénsia Primeiru-Ministru, Vise-Primeiru-Ministru na’in rua, Vise-Ministru ba Asuntu Parlamentár, SNI, no mós membru Governu tomak no partisipante sira ne’ebé iha relasaun.