Vise-Ministru ba Asuntus Parlamentares Sr. Adérito Hugo da Costa sai inspektur serimonia “Hasa’e Bandeira Nasional hodi komemora loron Proklamasaun Independensia Unilateral ba dala 49 iha Postu administrativu Fatuberliho, Munisípiu Manufahi.
Durante serimónia Hasa’e Bandeira Nasional ne’e Vise-Ministru ba Asuntus Parlamentares Sr. Adérito Hugo da Costa hato’o diskursu husi Prezidente Republika Dr. José Ramos Horta ba povu sira iha Fatuberliho iha loron proklamasaun ba dala 49 ne’e maske Prezidente Republika José Ramos Horta komemora loron ne’e iha Oe-cusse Ambeno.
“Ohin ita presta omenajen ho gratidaun kle’an ba eroi no martir sira ne’ebé sakrafika sira nia vida ba ita nia soberania, atu memoria husi kombatente aten-brani sira ne’e, inspira nafatin ita atu preserva dame no independênsia, no mós atu luta ba futuru ida ne’ebé justu mo inkluzivu liu, liuliu ba sira neebé presiza liu: labarik sira, feto sira, katuas ferik sira, no ema ho difisensia sira”. Dehan VMAP durante hato’o diskusu PR nian.
Iha Diskursu ne’e sita mós lasu amizade entre Timor-Leste no Indonésia ne’ebé sai ezemplar ida kona-ba ita nia relasaun bilateral no maturidade, ne’ebé harii iha baze rekonsiliasaun, dialogu no vizaun komun kona-ba futuru ida ne’ebé armoniza no paz.
Aleinde ne’e konflitu ne’ebé harahun TL ho surtu funu sivil iha tinan 1975 ne’ebé kauza husi radikal idiolojika, hamosu divizaun kle’an ne’ebé marka ita nia istoria, dezentendimentu irrasional sira ne’e rezulta iha funu trajiku ida entre maun alin sira, no lakon umanu sira ne’ebé labele sura no kanek sira ne’ebé kle’an. Ohin loron Timor-Leste no Indonesia nudar nasaun livre no demokratiku.
Hafoin remata Hasa’e Bandeira Nasional VMAP akompaña Jogu Final wesama ho Kifer no fahe mós premiu ba Jogador sira ne’ebé maka anima ona komunidade iha komemorasaun loron Proklamasaun Independensia Unilateral ba dala 49 durante semana ida (hahu 25-28 Novembru 2024).
Iha serimonia ne’e hetan mós partisipasaun masimu husi Administrador Postu Administrativu sira, Autoridade Lokal, Xefe Suku, Profesores, Estudante no komunidade Fatuberliho.