Dili, Segunda, 09 Dezembru 2024 – Negósiu sira ne’ebé hala’o hosi sidadaun Xinés iha Timor-Leste buras maka’as, maibé parte barak preokupa ho impaktu negativu ba ekonomia lokál. Tanba ne’e, membru parlamentu lubuk ida husu ba governu atu kria kedas regulamentu ka lei ne’ebé bele limita negosiu Xina nian, liu-liu sira ne’ebé loke loja iha área ho populasaun ki’ik.
Tuir Membru Parlamentu husi bankada Fretilin, Óscar Lima katak, negósiu Xineza ne’ebé loke loja iha área ho populasaun limitadu iha risku atu prejudika komunidade lokál sira. “Ami husu ba governu atu kria lei ne’ebé bele regula negosiu xinés sira, atu nune’e labele perturba ekonomia povu Timor-Leste nian, ne’ebé ikus mai iha poténsia atu kria instabilidade,” dehan Lima.
Deputadu Lima mós hatutan tan katak loja sira ne’ebé na’in Xineza barak mak dezenvolve lalais ona iha área remota sira, hanesan munisípiu Ermera , ne’ebé antes ne’e ladún iha Xineza barak. Ida-ne’e agrava liután kompetisaun negósiu nian iha Ermera.
Entretantu, Membru Parlamentu husi bankada CNRT, Natalino dos Santos, kritika mós loja barak ne’ebé na’in mak sidadaun Xineza ne’ebé loke negósiu iha Timor-Leste fa’an sasán ho kualidade ki’ik. “Ha’u preokupa kona-ba ezisténsia loja sira ne’ebé fa’an sasán ho kualidade ki’ik tebes, ne’ebé iha poténsia atu estraga ambiente no prodús lixu barak,” realsa dos Santos.
Deputadu na’in rua ne’e husu ba governu, liuhosi Ministériu Komérsiu no Indústria, atu formula kedas regulamentu ne’ebé limita númeru loja ne’ebé bele loke hosi sidadaun xinés sira, nune’e bele ajuda mós fó benefisiu ba populasaun sira loke Kios ne’e, nomós garantia kualidade sasán ne’ebé fa’an iha merkadu.
Ezijénsia hirak ne’e inklui mós nesesidade ba inspesaun ne’ebé rigorozu liu ba produtu sira ne’ebé fa’an hosi loja sira ne’ebé sidadaun xinés sira mak na’in, hodi husu ba instituisaun sira hanesan AIFAESA no IQTL atu hala’o kontrolu kualidade ba produtu sira ne’ebé sirkula iha merkadu.
Sekretáriu Estadu Komunikasaun Sosiál, Sr. Expedito Dias Ximenes ne’ebé reprezenta Vise-Ministru ba Asuntus Parlametares hateten katak informasaun kona-ba asuntu ne’e simu ona husi governu no sei diskute iha reuniaun kosellu ministru nian iha loron-kuarta. “Governu sei hala’o kedas enkontru ho ministru sira atu ko’alia kona-ba problema ne’e no hetan solusaun ne’ebé adekuadu”, esplika Ximenes.
Sesaun Plenaria ne’e rasik marka prezensa masimu husi deputadu VI legislatura sira.