Dili, Segunda, 09 Dezembru 2024 – Parlamentu Nasionál hala’o reuniaun plenária ne’ebé prezide husi Prezidente Parlamentu Nasionál, Sr. Fernanda Lay, hetan partisipasaun husi Sekretáriu Estadu Komunikasaun Sosiál, Sr. Expedito Dias Ximenes no mós membru deputadu/a sira. Iha plenária ne’e, membru deputadu/a lubun ida kritika dezenvolvimentu desportu iha Timor-Leste, liu-liu futebol, ne’ebé haree ladún iha progresu maske iha jestaun fundu no fasilidade ne’ebé governu fó.
Membru deputadu husi Bankada Opozisaun, Deputadu José da Cruz, destaka Timor-Leste nia fallansu atu hetan rezultadu pozitivu iha kompetisaun internasionál sira, hanesan derrota ho skor 10-0, 8-0 no 6-0, inklui hasoru Tailándia ho skor 10-8 . Nia husu ba Ministériu Juventude no Desportu (MJAK) atu toma responsabilidade hodi hasa’e kualidade futeból nasionál no sujere programa ida ne’ebé sériu liu hodi dezenvolve desportu iha rai ida ne’e. “Desportu tenke sai prioridade, tanba ne’e hanesan investimentu ida ba futuru nasaun nian,” dehan José da Cruz.
Aleinde ne’e, Deputadu Antonino Doutel Sarmento fó apoiu ba treinadór joven Timor-Leste no jogadór sira ne’ebé durante ne’e luta maski hasoru derrota maka’as. Nia fó hanoin katak istória futeból iha Timor-Leste hatudu rezultadu ne’ebé estagnadu, no presiza iha mudansa ne’ebé signifikativu hodi hasa’e kualidade jogu. “Ita tenke halo mudansa para futeból Timor-Leste labele lakon beibeik,” dehan Deputado Sarmento.
Husu mós ba governu atu hadi’a kondisaun fasilidade treinu futeból nian, hanesan akontese iha estádiu no kampu treinu oioin ne’ebé konsidera la adekuadu. Deputadu José da Cruz sujere atu governu labele foka de’it ba eventu boot sira hanesan konsertu múzika, maibé tau atensaun mós ba infraestrutura ba prátika desportu ne’ebé di’ak liután.
Hatán ba ida ne’e, Reprezenta Vise-Ministru Assuntu Parlamentáres, hanesan mós Sekretáriu Estadu Komunikasaun Sosiál, Expedito Dias Ximenes, rekoñese katak MJAK iha responsabilidade boot iha hasa’e kualidade desportu iha Timor-Leste. Nia hatutan, governu tenta atu hadia kondisaun sira ne’e no espera katak atividade kompetisaun desportu la’os deit akontese iha nivel nasional, maibe mos iha nivel rejional.
Ximenes mós hateten katak iha tinan 2025, governu liuhosi MJAK sei halo kompetisaun ne’ebé envolve distritu no sidade oioin, ho objetivu atu hetan atleta potensiál sira. Governu mós tau ona atensaun espesiál ba Federasaun Futeból Timor-Leste (FFTL) atu nune’e bele hasa’e kualidade futeból nasionál.
Entretantu, iha planeamentu orsamentu estadu 2025, governu garante katak sei aloka fundu ne’ebé sufisiente ba dezenvolvimentu desportu, inklui fó apoiu ba Timor-Leste nia partisipasaun iha kompetisaun desportu nível internasionál hanesan CPLP. Governu mós sei forma komisaun organizadora hodi prepara buat hotu atu nune’e Timor-Leste bele kompete ho di’ak iha eventu internasionál sira.