Vise-Ministru ba Asuntus Parlamentares-VMAP, S.E Adérito Hugo da Costa, partisipa iha eventu entrega lisensa ba prospesaun no peskiza Minerais Metálikus ba empreza ‘Tivan Limited’ husi Australia, ne’ebé atribui husi Ministériu Petróleu no Rekursus Minerais (MPRM).
Turiskai 15 de Marsu 2025, Lisensa ne’e permite hala’o atividade prospesaun no peskiza ba rekursus minerais metálikus iha area hanesan: Munisipiu Manufahi (Postu Administrativu Turiskai, Alas, Same no Fatuberliu), Munisipiu Ainaro (Postu Administrativu Maubisse) no Munisipiu Manatuto (Postu Administrativu Laklubar).
Iha eventu entrega lisensa ne’ebé hala’o iha Postu Administrativu Turiskai, Munisipiu Manufahi, SE Primeiru Ministru Kay Rala Xanana Gusmão partisipa direta hodi akompaña, hamutuk ho membru IX Governu Konstituisional, Autoridade Munisipiu Manufahi, Ainaro no Manatutu, no komunidade Postu Administrativu Turiskai.
Bainhira dialogu ho komunidade sira Primeiru-Ministru, S.E Kay Rala Xanana Gusmão husu atu populasaun iha munisípiu tolu ne’e hamutuk ho Prezidente Autoridade sira, autoridade lokál sira atu koopera ho empreza husi ‘Tivan Limited’ bainhira empreza refere hala’o peskiza iha terrenu.
“Husu ba populasaun iha Ainaro, Manatuto no Manufahi atu kontribui hodi tulun empreza ne’ebé atu hala’o peskiza ho di’ak. Ema hotu-hotu nia kontribuisaun ne’e importante tebes. Presiza ita hotu nia apoiu ba servisu importante ida ne’e”, dehan PM Kay Rala Xanana Gusmão.
PM mós husu ba Turiskai oan sira, katuas ferik sira karik hetan iha imi nia toos laran ne’e laos ita nian de’it maibé ita nia rai nian.
Serimónia atribuisaun lisensa ne’e, organiza hosi Ministru Petróleu no Rekursus Minerais (MPRM), Francisco da Costa Monteiro hamutuk ho funsionáriu sira ne‘ebé implementa hosi Autoridade Nasionál Minerais (ANM) no realiza iha salaun Tribuna Sabailolo, Postu Administrativu Turiskai,
Iha serimónia ne’e, partisipa hosi membru Governu, Prezidente Autoriedade Munisípiu Ainaro, Manufahi, Manatuto, Admistrador Postu, Xefe Suku, komunidade no konvidadu sira.