Vise-Ministru ba Asuntus Parlamentares (VMAP), S.E Adérito Hugo da Costa, reprezenta IX Governo Konstituisional, akompaña Prezidente da Republika, S.E Dr. Jose Ramos Horta hola parte iha diálogu Inter – Jerasional ba Futuru Timor-Leste ne’ebe maka realiza iha salaun Institutu Boa Ventura Timor-Leste (IBTL) Luak, Suku Daisua, Postu Administrativu Same, Munisipiu Manufahi.
Iha diskurus S.E VMAP hateten “Futuru Timor-Leste nian iha ita-nia liman. Se ita serbisu hamutuk ho respeitu, uniaun no esperansa, ita bele harii nasaun ida-ne’ebé forte liu, justu liu no prosperu-di’ak liután”
Nia hatutan liutan katak “diálogu ne’e la remata iha ne’e, maibé sei iha ita-nia uma, ita-nia komunidade sira no iha espasu hotu-hotu ne’ebé ita-nia doben Timor-Leste nia futuru, deside ona” dehan VMAP S.E Adérito Hugo da Costa.
Aleinde ne’e dialogu ne’e ho objetivo ida katak “ Inter – jerasional ne’e maka hanesan, Ponte ba Plataforma ligasaun entre jerasan sira hotu; Fo oportunidade ba jerasaun foun sira atu partilha hanoin kona ba dezenvolvimentu Sosial, Ekonominomia no Politiku; Halo diskusaun konstrutiva ba politika Públika inkluzivu no haforsa knaar jerasaun foun atu kontribui ba mudansas pozitivas; Promove konsensu no solusaun komum iha prezente no futuru ”
Dialogu ne’ebé maka realiza husi grupo (MOTIVA) ne’e ho tema “Dialogu Interjerasional ba Futuru Timor-Leste”.
Dialogu ida ne’e lidera husi, Moderador; Akademista no Profesor Doutor Aniceto Guro – Berteni Neves, Orador Prinsipal, Prezidente da Republika Dr. José Ramos – Horta no Painelista nain rua (2) ; Eis PM VI Gov Dr. Rui Maria de Araújo no Prezidente MOTIVA Sr. Fidelis Leite Magalhães.
Iha dialogu ne’e partisipa mos husi PAM Manufahi, Komandante PNTL, Komandante F-FDTL postu Betano, Reitor IBTL, Autoridade Lokal, Juventude no Estudante husi IBTL.