Vise-Ministru ba Asuntuss Parlamentares (VMAP), S.E Adérito Hugo da Costa, hola parte iha Komemorasaun Loron Aniversariu Polisia Nasional Timor-Leste (PNTL), Ba Dala XXV iha loron 27 fulan marsu tinan 2025, iha Palacio Governo.
PNTL hanesan instituisaun importante tebes ne’ebé fó seguransa nasionál no protesaun sivil iha Timor-Leste, PNTL hala’o servisu importante tebes ba Timor-Leste nia dezenvolvimentu no estabilidade.
Tuir istoria, iha tinan ruanulu-resin lina (25) liubá, iha loron 27 fulan-marsu tinan 2000, grupu dahuluk husi polísia foin-sa’e na’in 50 hahu sira-nia treinamentu no hamosu East Timor Police Service (ETPS) ne’ebé ikus mai troka ho naran PNTL.
Iha diskurus Komandante Jeral PNTL Komisariu Jeral Polisia, Sr. Henrique da Costa hatete “durante tinan hirak ne nia laran, Polisia adapta no halao evolusaun sosiedade nian no konsolida ninia pozisaun nu’udar ajente ida-ne’ebé prodús seguransa, sempre hatudu kapasidade boot ida ba uniaun, no hametin populasaun nia konfiansa”.
Komandante Jeral PNTL Komisariu Jeral Polisia, ne’e mós salienta liutan prioridade lima (5) ne’ebé sira define ona hanesan komprimisiu ba sira nia mandatu atinji ona objetivu balun “Ami mos aprezenta prioridade 5 ne’ebé ami define ona e hanesan komprimisiu ba ami nia mandatu, no agora atinji ona objetivo balun, mak hanesan: Jestaun Institusional, ami kontinua halo ajustamentu ba estrutura PNTL nian, ho objetivu implementa Lei Organika, Estatutu PNTL, no matadalan sira, hodi kontinua ho promosaun, rekrutamento, kriasaun instituto Superior da Polisia, Akademia Polisia, Asosiasaun Esposa-Marido PNTL, halao tratamento saude ba membro PNTL ho sira nia familia liu husi koperasaun ho Ospital Nasional e parseiro sira seluk”. Dehan Komandante Henrique.
PNTL mós komprimisu atu servisu makas liután hodi melhora no moderniza infra-estrutura sira atu nune bele fo ninia rejultadu ne’ebé di’ak liután.
Iha sorin seluk iha dia 21 marsu, PNTL lansa ona sistema enkontru online, ne’ebé aliña mós ho vizaun Governo nian ba implementasaun E-Government.
PNTL mós fó oportunidade ba feto sira hodi okupa pozisaun lideransa iha nivel topu tun to’o munisipiu, esquadra, seksaun no ofisial polisia suku.
Hanesan ita hotu hatene katak Timor-Leste nia preparasaun ba adezaun ba Asean, nune’e setór seguransa sai hanesan setór determinante ida ne’ebé presiza servisu makas no kualidade hodi kontribui ba adezaun ba ASEAN.
PNTL mós komprimisu atu hatudu nafatin servisu profesionalizmu, hadi’ak atendimentu públiku, servi povu ho dignu, no fó seguransa ne’ebé prosperidade ba nasaun Timor-Leste.
Iha aniversariu PNTL ne’e rasik marka prezensa maximu husi Primeiru Ministru, Membru Governu sira, Prezidente Parlamentu Nasional, Distintu deputadu sira, Embaixadores sira, inklui konvidadus de onra sira ne’ebé PNTL konvida
Parabens ba Aniversariu PNTL.