Vise-Ministru ba Asuntus Parlamentares (VMAP), S.E Adérito Hugo da Costa partisipa iha lansamentu livru “Xanana Sasulu Dame Nian” iha salaun multi uzus, GMN Bebora.
Livro ne hakerek husi jornalista Timor oan ho naran, Câncio “Cassimata” Ximenes ho títulu “Xanana Sasulu Dame Nian”.
Kontekstu no signifikadu livru ne’e bazeia ba polítika rekonsiliasaun nasional, dokumenta períodu importante husi Timor-Leste ninia istória, husi tinan 1999 to’o 2024.
Livru ne’e ho objetivu prinsipal mak rekonsiliasaun komunitária, ho foku espesial ba: Reintegrasaun timoroan sira ne’ebé iha 1999 refujia ba Timor Osidental, Suporta fila-fali ba Timor Fasilita prosesu rekonsiliasaun liu hosi CAVR.
Livru “Xanana Sasulu Dame Nian” ne’e mós hakerek ho pájina 423 hahu husi tinan 1999 to’o 2024, nune’e eskritór Câncio Ximenes hateten “livru Xanana Sasulu Dame nian hanesan kolesaun ida hosi artigu simples sira ne’ebé nia hakerek iha períudu tinan 1999 to’o 2014 ho pájina 423, imprime hosi impressora ida iha Indonézia”.
Aleinde ne’e Livru refere sai hanesan matadalan ida ba foinsa’e sira hodi bele aprende liutan istoria no mós fo inspirasaun ba foinsae sira hodi aprende hakerek livru.
Livru ne’e organizadu iha seksaun tolu importante:
“Ha’u Hakerek”: Artigu 18 ne’ebé hakerek kona-ba Kay Rala Xanana Gusmão, luhu dahuluk hakerek poezia ne’ebé Xanana rasik hakerek iha Salembang Indonezia, iha loron Abril 1999, no publika iha Suara Timur-Timur iha 8 Abril 1999 kona-bá Masakre Liquiça.
“Xanana Ko’alia”: Iha luhu da-ruak nian ho títulu Xanana Ko’alia. Luhu ne‘e halibur mensajen Estadu nian hosi Xanana Gusmão durante asume knaar hanesan Xefe Estadu ne‘ebé ko‘alia kona-bá rekonsiliasaun, dame no justisa ho nia diskursu hamutuk 7.
Rekolesaun mensajen estadu husi Xanana durante nia knaar hanesan Xefe Estadu, ho foku ba rekonsiliasaun, dame no justisa.
Análise Poétika: Analiza no komentáriu kona-ba poezia sira husi Xanana Gusmão. Iha luhu terseiru, eskritór hakerek kona-bá Xanana Le hela ninia puizia sira. Eskritór hakerek no halo koméntáriu bá poezia sira ne’ebé Kay Rala Xanana Gusmão rasik mak hakerek.
Ikusliu eskritór halo rezumu hosi livru ne‘e maka, Xanana Sasulu Dame nian hodi deskobre katak, Xanana mak Poema moris, Xanana mak Poezia moris, Xanana mak Pintura moris, Xanana mak Imajen moris no Xanana mak Sasuru Dame Nian ne‘ebé lakan, lakan, lakan nafatin bá nafatin.
Livru “Xanana Sasulu Dame Nian” sei disponivel kedas ba publikasaun no nune’e kontinua atu hatuur dokumentasaun importante kona-ba Timor-Leste nia luta no rekonsiliasaun.
Serimónia lansamentu ne’e hetan partisipasaun husi, Prezidente Parlamentu Nasionál, Maria Fernanda Lay, Deputadu sira, Membru Governu, Família eskritór Konvidadu de onra sira.