Vise-Ministru ba Asuntus Parlamentares (VMAP), S.E Adérito Hugo da Costa, hato’o hela resposta ba deklarasaun polítika bankada opozisaun durante sesaun plenaria iha Parlamentu Nasional
IX Governu konsiente ho defisiénsia iha administrasaun públika no proklama sei halo reforma setór hotu administrasaun públika nian tanba asiste faktu iha terenu konaba dezempeñu iha administrasaun públika durante tinan 23.
Komprimisu IX Governu nian ne’e hato’o ona liu husi Primeiru-Ministru Kay Rala Xanana Gusmão iha ninia diskursu iha serimónia tomada de posse ba IX Governu ne’ebé refelta pontu situasaun atuál ne’ebé labele ignora ho konsiénsia tomak atu rekoñese faktu husi dezempeñu orgaun Estadu hotu nian.
Vise-Ministru ba Asuntus Parlamentares (VMAP), S.E Adérito Hugo da Costa, hato’o afirmasaun ne’e hatan ba deklarasaun polítika bankada opozisaun FRETILIN ne’ebé hateten katak desde IX Governu hahú ukun kuaze ministériu hotu hapara ajente administrasaun públika lubuk ida ne’ebé iha ona experiénsia servisu durante tinan naruk ne’ebé maioria tama servisu liu husi selesaun por méritu ka konkursu públiku.
Iha deklarasaun polítika bankada FRETILIN ne’e mós sita katak desizaun hapara ajente administrasaun públika hodi substitui fali ho funsionáriu kontratadu foun ne’ebé nakonu ho interese polítika partidária viola prinsípiu lei estatutu funsaun públika ne’ebé hateten katak bainhira halo rekrutamentu ba funsionáriu ruma tenki liu husi konkursu públiku hanesan meiu ida atu avalia kualifikasaun, experiénsia no kompeténsia profisionál husi kandidatu ida sein diskriminasaun.
Membru ezekutivu ne’e akresenta presiza halo reforma administrasaun públika, tanba importante tebes hafoin Governu kaer ba pontu situasaun ida ne’ebé rekoñese rasik husi Prezidente Komisaun Funsaun Públika anteriór liuhusi deklarasaun ofisiál katak mosu dezorganizasaun demaziada iha administrasaun públika.
Mandatu Komisaun Funsaun Públika ne’ebé lideradu husi Prezidente KFP, Agostinho Letêncio de Deus no komisáriu sira dadaun ne’e halo servisu sériu tebes hodi halo rejime ba reforma obrigatóriu ho idade tinan 65 nune’e bele rezolve tiha problema ne’ebé akontese durante tinan 23 iha administrasaun públika liuliu dezorganizasaun demaziada nune’e bele ses ona husi intervensaun polítika ka partidarizasaun.
VMAP, hatutan liutan katak aleinde reforma administrasaun públika, Governu mós hahú halo dadaun reforma ba seguransa hafoin akontese reforma obrigatóriu ba membru polísia efetivu 158 iha mandatu ikus VIII Governu nian, hahú husi ofisiál, sarjentu to’o ajente ne’ebé dedika sira nia an durante tinan 10 to’o 20 nia laran.
Reforma ne’ebé Governu halo liu husi Ministériu Interiór maka iha aniversáriu PNTL nian ba dala 25 iha semana kotuk, halo promosaun ba membru PNTL sira ne’ebé hatudu iha projesaun ba futuru no hetan apresiasaun husi parte família, hodi ultrapasa dezorganizasaun demaziada iha instituisaun PNTL.
Hatan kona-ba preokupasaun katak promosaun ne’ebé halo balun hakat liu ba deviza rua ka tolu, Vise-Ministru ba Asuntus Parlamentares klarifika promosaun ne’e refleta ba avaliasaun husi sira idak-idak ninia dedikasaun ne’ebé balun hanesan ativista rezisténsia, balun kuadru rezisténsia sein promovidu durante tinan 20 no promosaun ne’e halo liu husi avaliasaun ne’ebé dignu.
Aleinde kestaun kona-ba erru iha administrasaun públika no kestaun seguransa, iha Sesaun Plenária Ordinária ne’e Deputadu sira mós levanta problema insfraestrutura bázika, edukasaun, saúde no seluk tan.