Dili, 01 Abril 2025 – Parlamentu Nasionál liu husi Reuniaun Plenária Ordinária aprova ona Proposta Lei no. 14/VI(2a) – Lei Enkuadramentu Orsamentu Jerál Estadu no Jestaun Finanseira Públika ne’ebé passa ho rezultadu votasaun afavór 38, Kontra 1 no Abstensaun 19.
Proposta Lei no. 14/VI(2a) ne’ebé aprezenta husi Governu liu husi Ministériu Finansa ne’e ninia orijen maka Lei no 2/2022, loron 10, fulan-Fevereiru, ho nia artigu hamutuk 126 no revoga fila fali ho Lei no. 14/VI(2a) ho totál artigu hamutuk 90 no husi artigu 90 ne’e artigu 23 maka sofre alterasaun.
Revogasaun no alterasaun ba artigu sira ho objetivu atu hadiá di’ak liu tan lei ne’e hodi bele jere ho efisiénsia no efikásia orsamentu Estadu nian, liuliu jestaun Fundu Rezerva Seguransa Sosiál inklui programa ezekusaun no relatóriu finál sira.
Ministra Finansa, S.E Santina J.R.F. Viegas Cardoso, apresia ho diskusaun Lei Enkuadramentu Orsamentál no Jestaun Finanseira Públika, hahú husi jeneralidade to’o espesialidade ho hanoin katak pedidu esklaresimentu barak ne’ebé hato’o husi Deputadu sira bele ajuda Governu no Parlamentu atu bele intende di’ak liu tan lei ne’e no simu krítika husi Deputadu sira liuliu Bankada Opozisaun hanesan parte ida atu mellora Lei Jestaun Finaseira Públika ida ne’e hodi bele nafatin promove transparénsia no akuntabilidade iha jestaun finansa públika.
Iha votasaun Finál Globál ba Proposta Lei ne’e, Governu husu nafatin Parlamentu atu akompaña Lei ida ne’e tanba sei uza hodi halo preparasaun ba Orsamentu Jerál Estadu (OJE) tinan 2026 nian, enkuantu ba Konta Jerál Estadu tinan 2024 ne’ebé maka Ministériu Finansa sei submete tenta atu prienxe rekezitu hotu ne’ebé maka tau iha lei ida ne’e.
Iha fatin hanesan, Deputadu Aniceto Guterres Lopes husi Bankada FRETILIN hateten lei ne’ebé Parlamentu Nasionál aprova dadaun ne’e la’os Lei foun, tanba iha tinan 2022 mandatu VIII Governu Konstituisionál aprova ona Lei númeru 2/2022, loron 10 fulan-Fevereiru, no iha mandatu IX Governu halo fali alterasaun ho Lei númeru 17/2023, loron 29 fulan-Agostu no númeru 21/2023, loron 27 fulan-Dezembru.
Tuir membru Órgaun Lejislativu ne’e, Lei refere hanesan alterasaun ida de’it la’os revoga totál, tanba 90% husi 89 artigu ne’ebé aprovadu dadaun ne’e mai husi Lei númeru 2/2022 no alterasaun ne’e konsideradu la signifikativu no substansiál, ne’ebé tuir lolos laiha nesesidade atu halo alterasaun no ho razaun ida ne’e maka maioria Deputadu bankada FRETILIN vota abstensaun no ida de’it maka vota kontra.
Iha parte seluk, Deputada Cedelizia Faria dos Santos husi Bankada CNRT ne’ebé hanesan mós Prezidente Komisaun C ne’ebé trata asuntu Finansa Públika hatete nia parte fó votu afavór ba lei ida ne’e tanba komisaun C maka envolve direita iha prosesu tomak ba Lei foun ida ne’e no konsidera Lei ida ne’e foun tanba halo alterasaun ba buat barak.
Prezidente Komisaun C ne’e explika, VIII Governu hateten katak halo orsamentu bazeia ba programa maibé halo virement 100% konforme hakarak de’it hodi muda kategoria ida ba kategoria seluk nein iha koñesimentu ba Parlamentu nune’e difikulta Órgaun Lejislativu ne’e atu halo ninia papél fiskalizasaun.
Iha sorin seluk, Ministra Finsansas hatutan tan katak “klaru Lei númeru 2/2022 no mós Lei 13/2009, ne’ebé sita kona-ba prosesu no prosedimentu”, “maibé Governu halo alterasaun ida ne’e, ho prinsípiu ko’alia kona-ba jestaun finansas públika, ne’ebé haree ba planeamentu, orsamentu, ezekuzaun no ninia relatóriu
Iha Lei ne’e mós hasai tiha Fundu Rezerva Seguransa Sosiál (FRSS) ne’ebé iha futuru sei halo halo kapitalizasaun, ne’ebé tau iha portál transparénsia maibé labele hatudu ninia ezekusaun ne’ebé fó impaktu bo’ot ba taxa ezekusaun jerál inklui hasai mós Banku Sentrál husi Lei ida ne’e.
Governu iha dalan atu atu lori Lei ne’e ba Parlamentu Nasionál tanba antes ne’e saldo uza de’it, maibé agora atu asegura sistema finansa públika tenki tau fila fali saldo iha OJE no iha kada tinan lori ba Parlamentu atu halo aprovasaun antes halo ezekusaun.
Entretantu hafoin aprovasaun ba Proposta Lei no14/VI(2a) – Lei Enkuadramentu Orsamentu Jerál Estadu No Jestaun Finanseira Públika, Komisaun C sei halo redasaun finál antes haruka ba Prezidente Repúblika atu promulga no publika iha jornál repúblika.