Atauro 05 de Junho 2025 – Vise-Ministru ba Asuntus Parlamentares (VMAP), S.E. Adérito Hugo da Costa, partisipa iha lansamentu programa prioridade lima (5) husi Ekonomia Azul, ne’ebé hala’o diretamente husi Primeiru Ministru Kay Rala Xanana Gusmão, iha loron 5 de Junho de 2025.
Programa prioridade lima (5) ne’ebé lansa mak hanesan, Espesies ikan foun no tara bandu tasi iha Maquili ho Biqueli, Suku Verde – inisiativa ba dezenvolvimentu sustentável”, Eskola Verde – programa edukasaun Ambiental, Brigada Ambiental – grupu atu promove protesaun Ambiental, Bé Moos – inisiativa ba protesaun no manejamentu rekursu natural.
Aleinde ne’e programa ne’e mós inklui, Pintura biodiversidade iha parede, Publikasaun livru ba dadus kona-ba akomodasaun iha Timor-Leste tinan 2025, Edisaun dahuluk Travel Atlas of Timor-Leste, ne’ebé hatudu potensialidade turizmu iha teritóriu Timor-Leste.
Atividade refere akompaña husi Vise-Primeiru Ministru, Ministru Koordenadór Asuntu Ekonomikus, Ministru Turizmu no Ambiente, S.E Francisco Kalbuadi Lay, membru governu da-9 balun, Autoridade Administrativa no Lokál Ataúro, no Diretora Ezekutiva Gabinete Fronteiras Terrestres no Marítima, atuál Xefe Gabinete Primeiru Ministru, Sra. Elizabeth Exposto.
Iha sorin seluk partisipasaun másimu husi komunidade Ataúro, estudante, funsináriu/a, no autoridade sira, ne’ebé hetan apia husi Ekonomia Azul. Kompromisu governu nian iha protesaun ambiental no dezenvolvimentu sustentável sei kontinua iha ámbitu Semana Mundial Oceanu tinan 2025, ne’ebé hala’o iha Autoridade Administrativa Ataúro.
Partisipante hirak ne’e partisipa ativu tebes hodi kontribui ba dezenvolvimentu sustentável.
Governu Timor-Leste nia planu ba dezenvolvimentu sustentável iha futuru inklui estratéjia sira atu hametin ekonomia, protesaun ambiental, no mellora kondisaun sosiál ba populasaun. #Remata