Vise Ministru ba Asuntu Parlamentes (VMAP), S.E Adérito Hugo da Costa, akompanha mos husi S.E Sekretariu Estadu Komunikasaun Sosiál Sr. Expedito dias Ximenes ofisialmente lansa programa podcast ho naran “Asuntus Parlamentares” Tersa-feira ne iha Edifício Palácio do Governo (photo/©MediaVMAP)
Díli, 10 de Juñu 2025 – Vise Ministru ba Asuntu Parlamentes (VMAP), S.E Adérito Hugo da Costa, ofisialmente lansa programa podcast ho naran “Asuntus Parlamentares” , ho objetivu atu hasa’e partisipasaun sivíl no transparénsia iha governasaun nasionál.
Programa podcast ne’e ho tema prinsipál “Democrasia em Ação – A relação entre o governo, o parlamento nacional e os cidadãos”, katak “Demokrasia iha Asaun – Relasaun entre Governo, Parlamento Nacional no Sidadaun sira”, reprezenta pasu importante ida iha esforsu atu aproxima instituisaun governu ho povu Timor-Leste nian.
Podcast ne’e nu’udar plataforma interativa ida hodi ddezenvolve dialogu entre Governo, Parlamento Nacional, no Sosiedade sira no programa ne’e mós bele kontribui atu hasa’e konsientizasaun públiku kona-ba importânsia dokumentasaun, leis no dezenvolvimentu polítika públika.
Nune’e intervensaun Vise-Ministru ba Asuntus Parlamentares, S.E Adérito Hugo da Costa hatete “Servisu ida ne’ebé mais espesializadus ba asuntu parlamentar liga ho korespondensia inisiativa sira ba lejislasaun nian entaun tenki jere iha ambiente ida asuntus parlamentares nian para iha kontinuasaun”.
Nia hatutan liután katak “Inisiativa ida ne’e reforsa tan ita hotu nia esforsu atu oinsa partisipasaun ativu públiku nian ba desizaun hirak ne’ebé estadu halo ba politika publika atu servi ita nia rain no servi ita-nia povo”, dehan VMAP.
Podcast “Asuntus Parlamentares” dezeña ho objetivu estratéjiku balun hanesan, Hasa’e komprensaun públiku kona-ba asuntus parlamentares no governansa, Fornese espasu ba diskusaun livre no konstrutivu, Eduka sidadaun sira kona-ba papel parlamentu iha demokrasia, Enkoraja partisipasaun komunidade iha diskusaun polítika.
Prezidente Komisaun Asuntu Konstitusionál no Justisa iha Parlamentu Nasionál S.E Patrocino Fernandes dos Reis hatete “Husi parlamentu apresia teb-tebes ba inisiativa ne’e, tanba ida ne’e hanesan inisiativa ida brillante, diak, atu tulun ema barak liu tan bele partisipa iha prosesu dezenvolvimentu liuliu oinsa ema bele troka hanoin iha politika publika sira ne’ebé maka Governo no Parlamento hakarak introduz nu’uda politika publika”.
Inisiativa ne’e bele kontribui significativamente hasa’e konsientizasaun públiku kona-ba importânsia dokumentasaun lejislativa, leis, no dezenvolvimentu polítika públika iha Timor-Leste.
Programa ne’e mós hanesan ferramenta importante ida atu sustenta diálogu kontínuu entre instituisaun estadu no komunidade, promove karakteristika ida demokrátika, interativu no partisipativu.
Sekuensia ba lansamentu podcast ida ne’e mak koa fita, vizita ba studio no iha tempu loraik kontinua kedas ho bensaun studio husi Reverendo Padre Juvito Rêgo de J. Araújo.
Serimónia lansamentu ne’e marka prezensa masimu husi Prezidente Komisaun A inklui Prezidente Bankada CNRT, PD no KHUNTO, inklui S.E Sekretariu Estadu Komunikasaun Sosiál no representante husi Presidensia Konsellu Ministro.
Programa Podcast “Asuntus Parlamentares” ne’e sei disponível liuhosi plataforma média Youtube VMAP nian iha link https://www.youtube.com/@GabineteVMAP no mós pajina Facebook VMAP nian ho naran Vice-Ministro dos Assuntos Parlamentares . #Remata