Vise-Ministru ba Asuntus Parlamentares, S.E Adérito Hugo da Costa hamutuk ho Ministru Prezidénsia Konsellu Ministrus, S.E Agio Pereira, nu’udar Ministru Justisa Interinu, hola parte iha diskusaun no votasaun final global Estatutu Ministériu Públiku, ne’ebé Governu demonstra no fo importánsia hodi reforma instituisaun refere. (photo/©mediaVMAP)
Dili, 23 Juñu 2025 – Parlamentu Nasionál Timor-Leste realiza sesaun plenária ordinária ne’ebé marca ho aprovasaun alterasaun importante ba Estatutu Ministériu Públiku nian no diskusaun polémica kona-ba kazu deportasaun Arnolfo Teves Jr.
Iha votasaun final global, deputadu sira aprova Proposta Lei nú 17/VI (2.ª) – alterasaun daruak ba Lei nú 7/2022, loron 19 fulan maiu, Estatutu Ministériu Públiku, ho apoiu ne’ebé forte, 38 a favor, 0 votus kontra, no 6 abstensaun.
Alterasaun daruak ba Estatutu Ministériu Públiku ne’e objetiva hadia funsionamentu no efikásia instituisaun justisa nian iha Timor-Leste. Aprovasaun ho votasaun unânime (la iha oposisaun) hatudu konsensus polítiku kona-ba presiza reforma sistema justisa.
Iha sorin seluk Rezolusaun Kona-ba Kazu Arnolfo Teves Jr. La-Passa, iha kontrastu ho aprovasaun unânime lei anterior, Proposta Rezolusaun nú 63/VI (2.ª) kona-ba apuramentu fatus sira kona-ba resesaun no deportasaun ba sidadaun Filipinas Arnolfo Teves Jr. Enfrenta rezultadu votasaun 20 a favor, 34 kontra no 4 abstensaun.
Arnolfo Teves Jr., ex-deputadu Filipinas, deporta husi Timor-Leste ba Filipinas iha fulan maiu 2025 depois autoridade Filipinas akuza nia involve iha atividade kriminál. Diskusaun parlamentar ne’e naruk no intense, refleta divizaun opiniaun kona-ba maneira governu liga ho kazu ne’e.
Sesaun plenária parlamentar ne’e demonstra natureza kompleksu demokrasia Timor-Leste nian, ne’ebé kapás halo konsensu iha asuntu importante ida no enfrenta divizaun iha kestaun sensível seluk.