Vise-Ministru ba Asuntus Parlamentares akompaña husi membru Governu sira ne’ebé relevante ba área finanseira no orsamentál lidera delegasaun Governu nian iha plenária “Apresiasaun kona-ba relatóriu no parecer relativu ba relatóriu ezekusaun orsamentál iha trimestre dahuluk tinan finanseiru 2025. (photo/©mediaVMAP)
Díli, 26 de Juñu 2025 – Vise-Ministru ba Asuntus Parlamentares (VMAP), S.E Adérito Hugo da Costa acompanha membru Governu sira apresenta relatóriu detalladu kona-ba progresu implementasaun orsamentu iha trimestre dahuluk nian iha sesaun plenária ho agenda “Apresiasaun relatóriu no parecer relativu ba relatóriu ezekusaun orsamentál trimestre dahuluk tinan 2025”.
Sesaun importante ne’e realiza iha edifísiu Parlamentu Nasionál Díli ho nia objetivu atu apresenta no diskute implementasaun orsamentu estadu nian iha fulan tolu dahuluk tinan finanseiru 2025 nian.
Iha introdusaun Vise-Ministra finansas, S.E Felicia Claudinanda Cruz Carvalho hateten “ezekusaun trimestre dahuluk ba orsamentu tinan 2025 nian inklui ezekusaun despesas no ezekusaun reseitas. Ezekusaun reseitas no despesas ne’e fahe ba parte haat: subsetores, administrasaun sentral tuir kategoria; seguransa sosial tuir kategoria; no RAEOA tuir categoria”.
Nia hatutan liutan katak “Ezekusaun orsamentu trimestre dahuluk nian kiik tanba Governo sei prepara no garante regras ezekusaun no prosedimentu legal sira, ne’ebé sei sai fundamentu ba prosesu ezekusaun orsamentu tinan ida ne’e. Regras sira ne’e sei orienta servisu entidades setor públiku administrativo sira atu sira bele komprende no prepara didiak molok hala’o ezekusaun orsamentu”, dehan S.E Felicia Carvalho.
Plenária ne’e foka ba Análize ezekusaun orsamentál iha Janeiru to’o Marsu 2025, Avaliasaun desempeñu setor sira nian, Identifikasaun desafiu sira no solusaun no Rekomenda ba melloria implementasaun iha trimestre tuir mai.
Partisipasaun Governo nian iha sesaun ne’e demonstra komprometimentu ba transparénsia no responsabilidade iha jestitu finansas públikas. Prezensa Vise-Ministru ba Asuntus Parlamentares subliña importánsia diálogu entre podér ezekutivu no lejislativu iha supervisaun orsamentál.
Hafoin apresiasaun no diskusaun iha plenária ne’e, espera katak Parlamentu Nasionál sei kontinua ho análize no sei fó rekomenda ba Governu kona-ba melloria implementasaun orsamentál iha períodu tuir mai.
Sesaun ne’e parte husi prosesu supervizu orsamentál ne’ebé regular, ne’ebé garante katak fundu públiku sira uza ho efikasiá no transparénsia ba benefísiu povu Timor-Leste nian.
Reuniaun plenaria ne’e, prezide husi Prezidente Parlamentu Nasionál, Maria Fernanda Lay, akompaña husi Membru Meza sira no hetan prezensa mos husi Membru Governu balun no tekniku sira.(photo/©mediaVMAP)