Vise-Ministru ba Asuntus Parlamentares (VMAP), S.E Adérito Hugo da Costa, hamutuk ho Vise-Presidente Senadu Parlamentu Malaysia, Onravel Datuk Nur Jazlan Bin Tan Sri Muhamad, hala’o sorumutu importante ida ho konsellu imprensa no media sira ne’ebé eziste iha Timor-Leste iha loron 02 fulan jullu, tinan 2025. (photo/©mediaVMAP)
Dili, 02 de julho 2025 – Reuniaun ne’e realiza hodi diskute kona-ba liberdade imprensa, transparênsia parlamentar no integrasaun regional molok Timor-Leste tama ba ASEAN. Objetivu prinsipal mak hodi identifika área sira ne’ebé Malaysia bele apoiu media Timor-Leste nian iha preparasaun ba membru ASEAN.
Vise-Presidente Senadu, Parlamento Malásia, Ilustre Senador DATUK Nur Jazlan Bin Tan Sri Mohamed, elogia liberdade imprensa iha Timor-Leste ne’ebé nia konsidera diak tebes.
“Index liberdade imprensa Timor-Leste hetan ona top 10, hafoin tun fali ba top 20, ne’e hatudu katak index diak tebes tanba livre kobertura no nakonu ho damen. Iha Malaysia média sir hetan kontrola hosi governu tanba problema relijiaun, problema oioin ne’ebe difisil no susar, entaun governu mak kontrola maibe iha Timor-Leste ne’e livre”, dehan Onravel Datuk Nur Jazlan Bin Tan Sri Muhamad.
Ilustre Senador DATUK Nur Jazlan Bin Tan Sri Mohamed aproveita oportunidade hodi fo agradese ba governu Timor-Leste no lideransa média sira tanba bele hasoru malu hodi fahe experiênsia no kunhesimentu liu hosi sorumutu ne’e.
Nia mós hato’o bem-vindu ba Timor-Leste ne mak iha fulan tolu tan (outubro), ofisialmente sai membru plenu iha ASEAN.
Vise-Ministru ba Asuntus Parlamentares, S.E Adérito Hugo da Costa, salienta katak Timor-Leste iha faze preparativu atu sai membru ba ASEAN, tanba ne’e importante tebes atu hasoru malu ho media nasional sira atu rona no fahe esperiensia.
“Posibilidade Governu Malaysia bele tau atensaun ba setor media nian liu-liu oinsa jornalista sira bele halo kobertura ba asuntu ASEAN”, dehan VMAP.
S.E Adérito Hugo da Costa akresenta tan katak Malaysia mos hatene katak adezaun ba ASEAN sei inklui mos partisipasaun husi setor hotu-hotu inklui media.
“Sira moos hatene asuntu adezaun ba ASEAN ne’e partisipasaun iha setor hotu-hotu inklui media. Setor hotu-hotu iha ita nia rai ne’e involve hotu tanba adezaun ne’e ba ho kompromisu, atu adere ba ASEAN ita tenke kompromete atu tama ba sistema no regra sira ne’ebe eziste iha komunidade ASEAN nian”, dehan VMAP.
Reuniaun ida-ne’e sei kontribui tebes ba hametin papél Imprensa Timor-Leste nian nu’udar meiu informativu ne’ebé reziliente no konektadu ho prosesu rejionál sira, liuliu adezaun tomak Timor-Leste nian ba ASEAN.
Sorumutu ne’e partisipa hosi, Konsellu Imprensa, Presidente RTTL E.P, Tatoli I.P, Diretor Mídia no Xefe Redasaun Mídia Nasional sira, Representa media ofisial Parlamentu Nasional, Media Presidência da República no Média membru governu no seluk tan
Reuniaun ne’e reprezenta pasu importante ida iha preparasaun Timor-Leste ba adezaun ASEAN, ne’ebé destaka papel vital media nian iha prosesu integrasaun regional. Kolaborasaun entre Malaysia no Timor-Leste iha área media sei kontribui ba hametin kapasidade jornalístika nasional no prepara profisionais media sira ba desafiu no oportunidade foun sira iha komunidade ASEAN.
