Ekipa Membru Konsellu Konsultivu Internasionál (IAC) husi Centro Chega! halo enkontru ho Vise-Minsitru ba Asuntus Parlamentares (VMAP), S.E Adérito Hugo da Costa iha Gabinete VMAP Palacio do governo Dili (photo/©mediaVMAP)
Díli, Timor-Leste – Membru Konsellu Konsultivu Internasionál (IAC) hosi Centro Chega! halo ona enkontru ho Vise-Minsitru ba Asuntus Parlamentares (VMAP), S.E Adérito Hugo da Costa, hodi reafirma sira-nia kompromisu atu kontinua fó apoiu tékniku espesializadu. Apoiu ne’e sei foka ba asuntu internasionál sira ne’ebé relasiona ho implementasaun Relatóriu Chega! no relatóriu sira hosi Komisaun Simu, Lia Loos no Rekonsiliasaun (CAVR) no Komisaun Pós-CAVR (PMAS).
Enkontru ne’e nu’udar pasu importante ida hodi hametin kolaborasaun entre Centro Chega! no Governo Timor-Leste nian iha esforsu atu promove rekonsiliasaun no justisa.
Delegasaun IAC nian kompostu hosi peritu no akadémiku internasionál ne’ebé iha koñesimentu kle’an kona-ba direitu umanu, justisa tranzisionál, no rezolusaun konflitu. Membru sira ne’ebé partisipa mak hanesan Prof. Dr. David Scott Webster, Prof. Dra. Sandra Marisa Ramos Gonçalves, Prof. Dr. Akihisa Matsuno, Pe. Alan Michael Lapsley, Sra. Galuh Wandita Soedjatmoko, Sr. Augusto Jr. Miclat no Sra. Khoo Ying Hooi, Ph.D.
Durante enkontru, membru IAC sira diskute asuntu importante balun, inklui
- Mudansa CNC: Kona-ba evolusaun no dezenvolvimentu hosi Centro Chega! nian papel no estrutura.
- Rekonsiliasaun no Reparasaun: Importánsia hodi kontinua prosesu rekonsiliasaun nian no implementa programa reparasaun ba vítima sira.
- Asuntu Rekonsiliasaun: Estratéjia sira atu habelun liutan prosesu rekonsiliasaun iha Timor-Leste.
Sua Exelénsia Adérito Hugo da Costa, Vise-Ministru ba Asuntus Parlamentares, simu ho laran kmaan vizita hosi Ekipa IAC. Nia subliña katak IX Governo konstitusionál Timor-Leste nian komprometidu tebes atu kontinua fó prioridade ba ajenda rekonsiliasaun nu’udar misaun prinsipál Centro Chega! nian.
VMAP mós hateten katak prezensa no apoiu hosi Ekipa IAC nu’udar benefísiu boot ba prosesu apoiu institusionál ba Centro Chega! Nia rekoñese kontribuisaun valoriza hosi peritu internasionál sira hodi hametin kapasidade no kbiit Centro Chega! nian atu hala’o mandatu ho efikásia.
Enkontru ne’e reflete kompromisu ne’ebé metin hosi parte rua, katak Governo Timor-Leste no Konsellu Konsultivu Internasionál, atu servisu hamutuk hodi garante implementasaun Relatóriu Chega! no promove rekonsiliasaun sustentável ba futuru Timor-Leste nian.