Primeiru-Ministru (PM), Kay Rala Xanana Gusmão akompaña husi Ministru Obras Públikas (MOP), Samuel Marçal noVise-Ministru ba Asuntus Parlamentares (VMAP), S.E. Adérito Hugo da Costa, hatuur fatuk no dahuluk hodi konstrui Ponte Lamara ne’ebé liga suku Manehat bá postu administrativu Natabora, munisípiu Manatuto, sábadu (02/08/2025). (photo/©mediaVMAP)
Natarbora, 02 de agosto 2025 – Vise-Ministru ba Asuntus Parlamentares (VMAP), S.E. Adérito Hugo da Costa, partisipa iha serimónia lansamentu fatuk dahuluk ba konstrusaun Ponte Lamara ne’ebé lokaliza iha Natarbora, Sábado ne’e.
Serimónia ne’e prezide husi Primeiru-Ministru Kay Rala Xanana Gusmão hamutuk ho Ministru Obras Públikas, Samuel Marçal, hodi lansa ofisialmente konstrusaun infraestrutura importante ida ne’e.
Projetu importante ida ne’e sei fasilita asesu transportasaun ba komunidade sira iha Natarbora, inklui populasaun husi Munisípiu Viqueque no komunidade sira husi Munisípiu Manufahi, liuliu sira ne’ebé hela iha Fatuberlihu. Aleinde ne’e Konstrusaun ponte ne’e sei hametin koneksaun entre munisípiu rua ne’e no sei hamenus tempu viajen ba komunidade lokal sira.
Iha diskursu serimónia nian, PM Xanana Gusmão hateten katak emprezas konstrutor tenke servisu ho kualidade aas.
“Hau husu ba empresa atu halo ho di’ak, halo ho kualidade tanba ponte ne’e halo ba povu Timor-Leste, liu-liu povu Barique-Natarbora. Halo ho kualidade atu uza ba tempu naruk, tanba ponte ne’e halo ba povu ne’ebé sai eróis ba ukun rasik-an, povu ne’ebé na’in ba independénsia no povu ne’ebé manan funu ne’e ho ruin no ran.” Dehan PM
Primeiru MInistru mós husu ba Natarbora oan sira atu badinas estuda aproveita tempu didi’ak hodi dezenvolve Natarbora iha futuru.
Iha sorin seluk, Ministru Obras Públikas hatutan liután katak “Primeiru-Ministru ko’alia bebeik kona-ba osan povu nian, tenke gasta ho di’ak. Tanba ne’e iha oportunidade ida-ne’e hau hakarak atu asina kontratu ho empresa iha imi hotu nia oin”, dehan MOP
Serimónia hatur fatuk dahuluk ne’e hahú ho simu Primeiru-Ministru ho tara tais, dadolin hosi lia-na’in sira tuir kultura Natarbora nian.
Tuir kedas ida-ne’e, realiza assinatura plaka konstrusaun nian no kontinua ho hamulak hosi lia-na’in sira hodi husu matak malirin, hatur fatuk inan ne’ebé hetan bensaun hosi Amu Vigáriu Paróquia São Francisco de Asisi Welaluhu, Frei Domingos Xavier OFM.
Iha oportunidade ne’e, na’in ba empresa ho mákina pezadu halo kedas servisu simbolikamente hodi hahú konstrusaun no kontinua loke ofisialmente kuadru projetu no dehan katak sei finaliza konstrusaun ponte refere ba Governu tuir data ne’ebé termina ona.
Istoria kona-ba ponte refere naruk 100 metru, luan 7 metru, Lokaliza iha suku Manehat ba Posto Administrativu Natarbora.
Konstrusaun Ponte Lamara ne’e demonstra Governu nia kompromisu transparente atu kontinua dezenvolve infraestrutura transportasaun iha nasaun tomak, atu fasilita asesu no hadia kualidade moris ba povu Timor-Leste.
Partisipa iha serimónia lansamentu ne’e mai husi Membru Governu sira hanesan Vise-Ministru Asuntus Parlamentares, S.E Adérito Hugo da Costa rasik hamutuk Vise-Ministru ba Infraestruturas, S.E Júlio do Carmo, Sekretáriu Estadu Komunikasaun Sosiál, S.E Expedito Dias Ximenes, Sekretáriu Estadu Dezenvolvimentu Lokál, S.E Mateus dos Santos Tallo Sekretáriu Estadu Veteranus, S.E César dos Santos da Silva, Prezidente Autoridade Munisípiu Manatuto, Sr. Luis Inacio Hanrique Fernandes no Autoridade lokál sira, Reprezentante Ajénsia Dezenvolvimentu Nasionál (ADN), Ekipa tékniku sira hosi MOP, Amu Vigáriu Paróquia São Francisco de Asisi Welaluhu, Frei Domingos Xavier OFM, Lia-na’in sira no Populasaun Natarbora.
