Vise-Ministru ba Asuntus Parlamentares (VMAP), S.E Adérito Hugo da Costa, akompaña husi Prezidente Autoridade Munisipál Manufahi, Sr. Luis Marçal da Costa Tavares partisipa iha primeira misa agradesimentu dahuluk husi Padre foun “Rones Magalhães Mau”, MSSCC, iha Munisípiu Manufahi, Postu Administrativu Same, Tutuluru, Domingo 3/07/2025. (photo/©mediaVMAP)
Manufahi 03 de julhu 2025 – Padre Rones Magalhães Mau, MSSCC, mak oan foun ida husi Tutuluru ne’ebé moris iha Dili iha loron 20 Marsu 1996. Nia viajen espiritual liu husi faze importante balu hanesan Votus Perpétua simu iha Sacindigliano, Napoli-Italia, iha loron 29 Outubru 2023, Ordenasaun Diákonu iha loron 7 Janeiru 2024, iha São Paulo, Latina Italia no Ordenasaun Nai Lulik realiza iha loron 5 Outubru 2024, iha Igreja Santa Catarina Magnanapoli, Roma-Italia.
Padre Rones Magalhães Mau, MSSCC, nia lema mak “Ema Diak Nia Dalan Mak Hanesan Naroman Ne’ebé Sai Nabilan Liu-tan To’o Loro Matan Monu” – ida ne’ebé hatudu nia dedikasaun ba servisu pastoral ho ezemplu di’ak.
Misa agradesimentu ne’e partisipasaun masímu husi komunidade sarani Tutuluru, autoridade lokál, padre, madre, no entidade relevante sira seluk hatudu apoiu boot ba Padre foun ne’e nia misaun pastoral iha nia rain moris.
Governo liuhusi PNTL no F-FDTL apoiu seguransa masimu durante serimónia misa santa ne’e la’o.
Misa santa ne’e mós reprezenta momentu importante ida ba komunidade Católica iha Same no mós ba Timor-Leste tomak, tanba hatudu komunidade nia orgullu ba jerasaun foun ida ne’ebé hetan vokasaun ba servi Maromak no ema.
