Dili, 05/09/2025 – Vise-Ministru ba Asuntus Parlamentares, S.E Adérito Hugo da Costa partisipa iha serimónia lansamentu ofisial Banco do Nosso Futuro (BNF), banku foun ne’ebé simu ona lisensa definitivu husi Banco Central de Timor-Leste (BCTL) atu hahú operasaun iha nasaun ne’e.
Banco do Nosso Futuro (BNF) sai banku foun iha sektor finanseiru Timor-Leste nian. Banku ne’e destaka nu’udar, Instituisaun finanseira ne’ebé harii no na’in mak veteranu sira rasik, no banku ne’e rasik simu ona aprovasaun kompletu husi autoridade monetária nasionál.
Serimónia inaugurasaun hala’o iha sede Konsellu Kombatente Libertasaun Nasionál (CCLN) nian iha Komoro. Eventu ne’e selebra estabelesimentu husi instituisaun finanseira ida ne’ebé harii husi veteranu sira rasik.
Lansamentu Banku ne’e rasik marka prezensa maximu husi figura importante sira hanesan, Prezidente Republika, S.E Ramos-Horta, Primeiru-Ministru, S.E Kay Rala Xanana Gusmão, Vise-Ministru ba Asuntus Parlamentares, S.E Adérito Hugo da Costa no Membru Governu sira.
Xefe Estadu halo jestu simbóliku wainhira loke konta dahuluk, ne’e hatudu ninia konfiansa ba potensiál husi BNF nian hodi kontribui ba prosperidade Timor-Leste nian.
Lansamentu BNF reprezenta etapa istórika ida ba antigu Kombatente sira, ne’ebé transforma husi protagonista ba libertasaun nasionál ba ajente ativu iha konstrusaun ekonómika nasaun nian, reflete marku maturidade ekonómika nian no atudu transformasaun husi rekursu veteranu sira-nian iha instituisaun finanseira sólida ho vizaun ba futuru.
Lansamentu BNF represent pasu importante ba diversifikasaun sistema banku iha Timor-Leste. Ho banku foun ne’e, Timor-Leste agora iha opsaun banku ida tan ba nia povu sira.
Lansamentu ida-ne’e espera atu kria kompetisaun pozitivu iha sektor banku no rezulta iha servisu di’ak liu ba konsumidor sira.
Maske harii atu serve nesesidade veteranu no sira-nia família nian, misaun banku nian inkluzivu no dirije ba sidadaun Timoroan hotu.
Banco do Nosso Futuro la’os de’it hanesan entidade finanseira ida maibé konsidera hanesan legadu husi luta ba libertasaun, ne’ebé dezenvolve atu fó kbiit ba sidadaun hotu no ajuda dudu kreximentu ekonómiku ba jerasaun sira tuirmai.
Banco Central de Timor-Leste (BCTL) kontinua nia papel supervisaun no regulamentasaun atu garante katak instituisaun banku sira ne’ebé foun lansa sira tau matan ba padraun internasionál seguransa no transparénsia.
