Kinta-feira, loron 04/07/2024, S.E Vise-Ministru ba Asuntus Parlamentares, Sr. Adérito Hugo da Costa, partisipa iha sesaun semináriu ne’ebé realiza husi Centro Nasionál Chega!, I.P.(CNC) ho tema “Papel Museu no Arkivu iha prezervasaun memória no introdusaun istória Timor-Leste”. ne’ebé hala’o iha Salaun CNC, Balide, Dili.
Iha diskursu Prezidente Konsellu Administrasaun Chega!, I.P, Sr. Manuel Mesquita Pereira, hateten “ Centro Chega!, I.P iha kompromisiu atu prezerva istória no memóriaTimor-Leste, CNC nia misaun la’os halo deit dokumentasaun, maibe foku mós ba transmisaun istória sira ne’ebé utíl ba jerasaun foun hodi haburas kultura dame nian no prevene repetesaun hahalok violénsia sira”.
S.E Vise-Ministru ba Asuntus Parlamentares iha diskursu hateten, “semináriu ida ne’e importante tebes, hanesan kompromisiu atu kontinua istória restaurasaun independénsia nian , movimentu ba demokrasia justisa ne’ebé hetan husi país ne’ebé apoia Timor-Leste nia ukun aan, presija iha komitmentu atu hadia arkivo istóriku ne’ebé governu iha kontinua dezelvolve, hodi nune’e ita hotu orgullu hola parte ba arkivu no muzeu hirak ne’e”.
Iha seminariu ne’e hetan partisipasaun, husi S.E.Sekretáriu Estadu Arte no Kultura, Sr. Jorge Soares Cristovão, Vise Prezidente Konsellu Veteranus, Sr. Marito Reis, Reprezentante Konsellu Imprensa, Membru Konsellu Admistrasaun Chega!, I.P, Oradores Internasionál nain ha’at (4) no Konvidadus sira.
