Dili, 16 Setembru 2024, S.E Vise-Ministru ba Asuntus Parlamentares Sr. Adérito Hugo da Costa partisipa iha serimónia tomada de pose ba Komisáriu Autoridade Aduaneira no kargu xefia sira Ministériu Finansas (MF) nian.
Serimónia pose ne’e bazeia ba rezultadu reuniaun Konsellu Ministru ne’ebé aprova ona projetu rezolusaun Governu nian, ne’ebé aprezenta husi S.E Ministra Finansas, Sra. Santina J. R. F. Cardoso, hodi nomeia Sr. Joanico Pinto nu’udár Komisáriu Autoridade Aduaneira.
Aleinde Sr. Joanico Pinto nu’udár Komisáriu Autoridade Aduaneira, pesoál ruanulu-resin neen (26) mak hetan konfiansa hodi asume kargu xefia no simu mós posse.
Iha fatin hanesan, Prezidente Komisaun Funsaun Públika (KFP), Sr. Agustinho Letêncio de Deus hateten katak “hetan nomeasaun bá tinan-haat la signifika permanente, tanba bainhira laiha dedikasaun maka’as, la hatudu kapasidade tuir prosesu teste, KFP no Ministériu Finansas bele dada fali funsaun ne’e kualkér tempu”.
S.E Primeiru Ministru Sr. Kay Rala Xanana Gusmão mós hateten katak “Lori Povu nias naran no Eroi sira ne’ebé mate nia naran ha’u afirma ha’u-nia konfiansa ba imi, husu onestidade no kompromisu servi rai ida ne’e”.
Iha sorin seluk atuál Komisáriu Autoridade Aduaneira Sr. Joanico Pinto promete prioridade servisu lubuk ida hanesan tuirmai ne’e “konsolida forsa interna hodi aposta bá kualidade servisu no hasa’e produtividade, promove kultura institusionál katak hamenus burokrasia no hasa’e efisiénsia no efikásia iha atendimentu públiku, hametin relasaun liuhosi reforsa koordenasaun no kolaborasaun di’ak ho instituisaun Estadu sira relevante atu asegura papél Autoridade Aduaneira nian liu-liu halo kontrolu ba atividade merkadoria sira no proteje fronteira hosi atividade ilegál no maximaliza kolesaun reseita bá Estadu”.
Inisiativa ida ne’e sei kontribui ba atinjimentu programa IX Governu Konstitusionál nian, no foku mós ba reforma institusionál hodi profisionaliza Autoridade Aduaneira nian.
Serimónia ne’e mós marka prezensa masimu husi S.E Primeiru Ministru Sr. Kay Rala Xanana Gusmão, no membro IX Governu Konstitusional
Parabens ba Komisáriu Autoridade Aduaneira atual no ekipa tomak, kontinua hatudu servisu di’ak ba rai doben Timor-Leste.
