Proposta Lei Orsamento Jerál Estadu ba tinan 2025 hetan aprovasaun hosi Konsellu Ministru iha loron 30 fulan-setembru tinan 2024 no entrega ona hosi Ministra Finansas ba Prezidente Parlamentu Nasionál, iha loron 1 fulan-outubru, aktu ida ne’ebé marka inísiu hosi prosesu orsamentál iha Parlamentu Nasionál.
“Proposta Lei OJE ba tinan 2025 ne’e tuir estratéjia implementasaun ba prioridade sira ne’ebé prevee iha Programa Governu, ho lema “Investimentu iha infraestrutura estratéjika, hametin ekonomia no hadi’a moris-di’ak sidadaun sira nian”.
Proposta ne’e elabora bazeia ba Objetivu Estratéjiku Governu Konstitusionál da-9 nian, ho objetivu atu promove dezenvolvimentu sósiu-ekonómiku ba Nasaun ne’e liuhusi investimentu alvu sira iha infraestrutura estratéjika, reforsu ekonómiku no inisiativa sira ne’ebé ho objetivu atu hadi’a moris-di’ak sidadaun sira-nian.
Objetivu husi OJE tinan 2025 ne’e mak atu promove dezenvolvimentu ekonómiku no hadi’a kondisaun moris populasaun timoroan nian, liuhusi estratéjia klaru ida ne’ebé foka ba kreximentu ekonómiku sustentavel, hadi’a servisu públiku no garante katak benefísiu dezenvolvimentu nian to’o ba sidadaun hotu-hotuʺ. (Fonte: CI,PCM)
Dokumentasaun no progresu prosesu orsamentu nian bele hetan asesu iha pájina Vise-Ministru Asuntu Parlamentár nian ne’ebé kria espesialmente ba objetivu ida-ne’e: testu no mapa sira hosi Proposta Lei Orsamentu Jerál Estadu nian, kalendáriu Debate, relatóriu no pareser husi Komisaun C, Finansas Públikas ne’ebé akompaña inisiativa, dokumentu setorál sira ne’ebé Governu haruka hodi fó apoiu ba audiénsia sira, proposta alterasaun ne’ebé Deputadu sira aprezenta durante debate no rejistu hotuhotu kona-ba votasaun sira ne’ebé aprova iha Plenáriu.
Debate orsamentu iha Plenária-Parlamentu Nasionál, ne’e nakloke públiku no ema hotuhotu bele asisti direta iha pelnária no mos bele sintoniza no akompaña transmisaun direta liuhosi Kanál YouTube no rádiu Parlamentu Nasionál nian, kanál RTTL, E. P. no Rádio, youtube Tatoli – Agência Noticiosa de Timor-Leste no kanál sira seluk ne’ebé iha asesu durante debate nian.
