DISKURSU
Sua Excia. Adérito Hugo da Costa
Vice-Ministro dos Assuntos Parlamentares
Enseramentu ba Sesaun Seminariu no Dialogu Festival Fronteira 2024
* * *
“Intercambiu Kultural Hodi Hametin Rekonsiliasaun Entre Timoroan“
Oecusse, 18 Otubru 2024
Ekselentisimu:
Reprezentante Sekretariu Estadu Arte no Kultura
Reprezentante Prezidente Autoridade RAEOA
Reprezentante Konsul Timor-Leste ba Kupang
Reprezentante Ketua FKPPT, Sr. Felixberto Amaral, ho Komitiva tomak
Prezidente no Membru Konsellu Administrasaun Centro Nacional Chega!
Prezidente Konsellu Administrasaun Konsellu Imprensa, ho Komitiva
Reprezentante Instituisaun Estadu tomak
Ekselensias Señora/es konvidadus,
Uluk nanain, hau hato’o apresiasaun ba partisipante no parseiru sira hotu ne’ebé partisipa iha Festivál Fronteira 2024. Durante loron 5 ne’e, ita asiste ona oinsá kbiit arte no kultura nian liga ho diversidade, hametin lasu sosiál sira no boa-vontade ba rekonsiliasaun. Ita-boot sira-nia prezensa hariku duni diálogu no hakbesik ita ba objetivu ba ideál dame ne’ebé dura.
Ekselensias, Señora/es Konvidadus,
Permite ha’u hahú ho pergunta ida, “Saida mak sai urjensia hosi Interkámbiu Kulturál ida ne’e ba rekonsiliasaun entre Timoroan?
Konserteza, esforsu ida-ne’e nu’udar instrumentu hodi inspira rekonsiliasaun entre Timoroan iha Timor-Leste, no “namkari” iha Indonezia, liuliu sira ne’ebé hafahe malu familia doben sira tanba konflitu pasadu. Muito menos iha razaun prinsipál sira, tansá maka esforsu ida-ne’e urjente:
1. Restaura Relasaun Sosiál no Emosionál:
Konflitu polítiku no istóriku husik hela kanek kle’an ba Timoroan barak, tantu iha Timor-Leste, mós Indonézia. Barak husi ita maka sei sai hela “dadur” hosi ita nia trauma koletivu no sentimentu izolamentu. Interkambiu kulturál nu’udar meiu ida ne’ebé permite ita troka esperiénsia no emosaun, kria espasu seguru ba kura relasaun sosiál no emosionál sira;
2. Liga hikas Timoroan Diaspora sira ho nia identidade kultural:
Ba Timoroan Diaspora sira iha Indonezia, liu-liu jerasaun foun sira, mantein ita nia identidade kultural ohin loron ne’e sai hanesan dezafiu boot ida. Interkambiu ida ne’e mak “ponte” atu deskobre hikas abut hosi identidade Timoroan, hametin sentidu pertensa, no evita aliepaís hosi ita-nia istória no tradisaun bei’ala sira-nian. Rekoñese mos kontribuisaun Timoroan Diáspora nu’udar parte integrante hosi identidade nasionál;
3. Momentum ba Reuni:
Ho esperiensia moruk ne’ebe iha opresaun kolonial sira iha tinan/tempu naruk, halo Timoroan fahe malu namkari lemo-lemo rai, ate familia balu foin mak hetan no halibur malu iha tempu ukun-an. Interkambiu ida ne’e sai momentu/oportunidade diak Timoroan sira atu reuni hikas ho familia, ne’ebe namkari hosi sira nia orijen to’o mai fronteira ne’e.
4. Diálogu Inkluzivu no Sustentável:
Rekonsiliasaun laos presiza de’it diálogu polítiku, maibé mós diálogu sósiu-kulturál ne’ebé envolve parte hotu-hotu iha sosiedade. Festivál kulturál, performa arte, no programa edukasionál sira fornese biban atu haburas konversa klean no onestu sobre pasadu, loke biban ba intendimentu liuhosi fronteira sívika sira.
5. Hametin kooperasaun transfronteirisu ba futuru:
Interkámbiu kulturál la’ós rekonsilia deit pasadu, maibé harii mos futuru kooperasaun. Enkoraja interasaun entre komunidade sira iha país rua. Hametin baze sosiál ba relasaun bilaterál iha área oioin, inklui edukasaun, turizmu no liu-liu ekonomiku.
Iha kontestu urjensia, interkambiu ne’e la’ós de’it prosesu naruk hodi kura kanek pasadu nian, maibé harii esperansa foun ba futuru. Timoroan hotu, iha ne’ebé de’it, sei sente valorizadu no ligadu iha lasu fraternidade ne’ebé forte, liuhusi interkambiu.
Tanba esnsialmente, “Interkambiu kulturál mak nu’udar konversa ida ne’ebé sem liafuan, iha ne’eba ita selebra diferensa no deskobre semellansa sira, liuhosi dansa, múzika no aprezentasaun arte tradisaun sira. Ita la’ós de’it koñese malu, maibé mós koñese ita-an rasik. Festivál ida-ne’e nu’udar prova katak iha diversidade, ita aprende, dame la’ós de’it laiha konflitu ona, maibé sempre ejiste sinerjia. Wainhira fuan no hanoin hotu-hotu vibra iha armonia ida hanesan, mak Ita sei selebra diferensa iha unidade no amizade.”
Ekselensias, Señora/es Konvidadus,
Ita agradese wa’in tebes ba Sekretariadu g7+, ne’ebe fasilita ona prezensa Sr. Desire Gasana Rwangeyo, husi Rwanda Cooperation, ne’ebe horiseik lorokraik (15/10/2024), mai fahe esperiensia murak husi melhor pratika sira kona-ba rekonsiliasaun iha Rwanda.
Rwanda nia esperiénsia apos jenosídiu (1994), hatudu katak kultura bele sai instrumentu ida forte no efetivu ba rekonsiliasaun. Programa kultural hanaran Itorero no Umuganda, ne’ebé kombina formasaun lideransa ba foin-sa’e sira nu’udar alvu prinsipál, no serbisu komunál (kerja bakti) ne’ebé envolve sosiedade hotu. Aleinde ne’e, Tribunál Gacaca iha Rwanda fornese ezemplu sobre oinsá diálogu partisipativu funsiona nu’udar mekanizmu ida atu restaura relasaun sira no rezolve konflitu sira. Timor-Leste ho Indonézia iha ona nia modelu aprosimasaun tradisionál rasik. Agora ita presiza de’it mak oinsa atu inisia iha país rua, atravez forma kolókiu kulturál sira. Tradisaun tolu ne’e hatudu, oinsa identidade koletiva ne’ebe destrui durante konflitu etniku bele re-estabelese hikas. Hein katak melhor pratika sira ne’e bele inspira Timoroan tuir kontestu no nesesidade.
Ekselensias, Señora/es Konvidadus,
Iha Festivál ida-ne’e, ita lansa tiha ona livru ida ho títulu “Hametin Kultura no Rekonsiliasaun: Estratéjia sira ba Harii Unidade“, nu’udar sínteze ida hosi diskusaun sira iha Festivál Fronteira 2023. Livru ne’e la’ós halibur de’it rekomendasaun, maibé mós maneira, nu’udar baze atu intende Timor nia identidade no ezisténsia liuhosi perspetiva istoriográfika. Hein katak livru bele sai mata dalan ba povu Timor hodi hasoru dezafiu sosiál sira no hametin unidade. Livru ne’e realiza duni tanba kolaborasaun entre Centro Chega! ho Pe. Gregorius Neonbasu, SVD, Ph.D, husi Fakuldade Antropolojia, Universidade Widya Mandira, Kupang.
Aleinde ida-ne’e, Centro Chega! (TL) no Sanata Dharma University, Yogyakarta, mos hahú ona peskiza hodi esplora memória koletiva Timor-Leste no Indonézia nian. Esplora akontesimentu istóriku sira ne’ebé relevante ho esperiénsia transfronteirisu entre TL no RI. Objetivu la’ós de’it atu hanoin hikas pasadu, maibé mós atu halibur mekanizmu sira ba kura sosiál no emosionál liuhosi narativa sira ne’ebé kompoen valor solidariedade no rekonsiliasaun nian.
Inisiativa ida ne’e merese hetan apresiasaun nu’udar pasu ida ne’ebé importante. Katak rekonsiliasaun tenke hahú hosi povu rasik duni – ne’ebé abut iha sira-nia esperiénsia, sentimentu no istória. Liuhusi aprosimasaun ida-ne’e, komunidade sira la’ós ona objetu, maibé sai mós atór ativu iha prosesu rekonsiliasaun.
Hein katak rezultadu peskiza nian sei sai útil ba konteúdu kurríkulu edukasionál sira iha eskola Timor-Leste no Indonézia nian, ne’ebé hanorin komprensaun transkulturál no istória. Ida-ne’e sei hametin relasaun no komprensaun entre jerasaun sira (kruz) no enkoraja formasaun komunidade sira ne’ebé inkluzivu liu iha fronteira sira no iha komunidade sira diaspora nian.
Projetu istoriográfiku balu hosi país seluk bele inspira ita. Porezemplu, depois Funu Mundiál Daruak, Fransa no Alemaña konsege hametin sira-nia relasaun diplomátika hodi hakerek livru istória hamutuk. Nune’e mós, inisiativa Türkiye no Arménia nian hahú diálogu produtivu ida hafoin konflitu, maski kanek klean sira sei iha nafatin.
Ekselensias,
Rekonsiliasaun nu’udar prosesu ida ne’ebé presiza boa-vontade no partisipasaun komunidade. Governu Timor-Leste komprometidu atu hametin rekonsiliasaun nu’udar ai-riin prinsipál ba pás no demokrasia. Ita sei kontinua integra abordajen rekonsiliasaun nian iha polítika dezenvolvimentu oioin, inklui iha domíniu edukasaun, arte no kultura.
Esperiénsia hosi Rwanda, ka hosi Irlanda Norte, iha ne’ebé aproveita programa ko-edukasaun sira hetan susesu hodi liga foin-sa’e sira entre grupu sira. Aprosimasaun ida ne’e konserteza sai prátika di’ak ida ne’ebé inspira ita. Governu Timor-Leste sei ativu liu tan hodi enkoraja diálogu entre jerasaun no hametin edukasaun ba pás, ida sustentavel liu tan entre Timoroan sira iha país rua.
Faktu importante ida iha Festival Fronteira tinan ida ne’e mak inisiativa Paktu Rekonsiliasaun, ne’ebe defaktu ne’e ideia husi Forum Komunikasaun Kombatentes Timor Lorosa’e (FKPTT) rasik. Paktu ne’e sei sai símbolu importante ba kompromisu povu Timoroan iha país rua ne’e atu hametin dame liuhosi rekonsiliasaun. Paktu sei fo benefísiu ba Timor-Leste no Indonézia, inklui:
- Hametin Interasaun Sosiál liuhosi Festivál sira iha Fronteira;
- Kolaborasaun ekonómiku (merkadu fronteira) hadi’a bem-estar povu;
- Hasa’e promosaun turizmu arte-kulturál nu’udar riku hosi país rua;
- Reduz tensaun polítika liuhosi atividade sira, enkoraja interasaun pozitivu;
- Harii konxiénsia entre jerasional sobre importánsia hosi dame no kooperasaun nian;
- Envolve Timoroan Diáspora iha atividade transkulturál sira, hodi hametin relasaun entre Timoroan iha Indonézia no Timor-Leste.
Ekselensias, Señora/es Konvidadus,
Ho semináriu no diálogu ida-ne’e nia rohan, ita hotu sei fahe malu no lori ba uma kompromisu foun ida, atu kontinua hametin rekonsiliasaun no mantein relasaun di’ak entre Timor-Leste no Indonézia. Mai ita konsidera festivál ida-ne’e nu’udar ajenda regulár ida, hodi aprofunda interasaun sosiál no kulturál sira ba futuru ida ne’ebé armoniozu liu. Tanba:
“Rekonsiliasaun mak ponte ne’ebé ita harii husi rahun kanek pasadu nian, fatin ne’ebé korajen ita atu perdua hasoru esperansa iha futuru. Festivál Fronteira 2024 hatudu ona katak arte no kultura maka ferramenta sira ne’ebé efetivu atu harii ponte ne’e.”
Ho ida-ne’e, ha’u taka ofisialmente Semináriu no Diálogu iha Festivál Kulturál Fronteira 2024 nian. Obrigado ba ita-boot sira nia partisipasaun, no hasoru malu fali iha Festival Fronteira 2025, iha Munisipiu Covalima!
Obrigado wa’in.