Ministru Administrasaun Estatal – MAE, Sr. Tomás do Rosário Cabral, aprezenta Programa no Orsamentu OJE 2025 iha Audénsia Públika ba deputadu/a sira iha komisaun A trata asuntu Konstitusionál no Justisa, Komisaun C trata asuntu Finansas Públikas no Komisaun G trata asuntu Edukasaun, Juventude, Kultura no Sidadania iha loron 22 fulan-Outubru tinan 2024.
OJE 2025 MAE aposta programa Lima (5) mak hanesan Desentralizasaun Administrativa no Poder Lokál, Funsionamentu no Dezenvolvimentu Institusionál, Inkluzaun Sosiál, Toponímia no Organizasaun Urbana no Dezenvolvimentu Lokál ho ninia orsamentu totál US$25,998.921.00.
Orsamentu US$25,998.921.00, kobre ba Saláriu no Vensimentu ho totál $11.756.843,00, Bens no Servisu totál $11.756.843,00, Kapitál Menor ho totál $358.000,00, Transferénsia Públika ho totál $2.203.705,00 no Kapitál Dezenvolvimentu, MAE la prevé orsamentu.
Orsamentu ba MAE ne’ebé previstu ba tinan 2024 ho montante totál $64.174.666,00 no ninia ezekusaun iha portál transparénsia loron 22 fulan-Outubru atinji ona 80.2 %, entretantu MAE fiar katak iha fulan-Dezembru tinan 2024, ezekusaun sei atinji 100%.
Bainhira halo komparasaun entre OJE 2024 ho OGE 2025 maka MAE nia orsamentu hetan redusaun, tanba servisu barak entrega tiha ona ba munisípiu sira ka delega ona kompeténsia, hamutuk servisu 8, inklui Merenda Eskolár no servisu saúde bázika, maibé ho nafatin kontrolu husi Governu Sentrál.
Iha aprezentasaun programa no orsamentu OJE 2025, MAE nian iha audénsia públika ba Deputadu/a sira iha komisaun A, C no G, lidera rasik hosi Ministru Administrasaun Estatal – MAE no akompaña hosi Vise-Ministru Administrasaun Estatál, Sekretáriu Estadu Asuntus Toponímia no Organizasaun Urbana, Sekretáriu Estadu Dezenvolvimentu Lokál, Sentru Akollimentu Multifunsaun, Sekretariadu Tékniku Administrasaun Eleitorál (STAE), Arkivu Nasionál Timor-Leste (ANTL), Institutu Nasionál Administrasaun Públika (INAP), Fundu Espesiál ba Dezenvolvimentu Ataúru (FEDA), no Prezidénte Autoridade Munisipál sira hotu.