Komisaun A Parlamentu Nasionál ne’ebé trata asuntu Konstitusionál no Justisa halo audiénsia públika ho Komisaun Nasionál Eleisaun (CNE), iha Sexta-feira, loron 25, fulan-Outubro tinan 2024, iha sala konferénsia Parlamentu Nasionál.
Iha audiénsia públika ne’e, Vise-Prezidente Komisaun A, Deputadu António Verdial, ne’ebé lidera audiénsia fó biban ba Prezidente CNE, José Belo, hodi aprezenta proposta OGE 2025 no progresu taxa ezekusaun orsamentu 2024 nian, antes fó biban ba Deputadu sira Komisaun A nian hodi koloka kestaun sira liga ho OGE ne’ebé alokadu ba CNE iha tinan ne’e no tinan oin.
Iha aprezentasaun, Prezidente CNE, José Belo, hatete OGE 2024 ne’ebé alokadu ba CNE ho montante $.8.836.929,00 ho ninia taxa ezekusaun iha portál transparénsia loron 24, fulan-Outubro atinji 81,4%, previzaun to’o Dezembru bele atinji 90% resin no proposta OGE ba 2025 ho montante $9.016.593,00.
Wainhira halo komparasaun entre OGE 2024 ho OGE 2025 maka OGE 2025 ba CNE iha aumentu ne’ebé sei aloka ba kategoria Saláriu no Vensimentu ho montante $1.173.171,00 no Bens no Servisu Korente $1.143,462,00, Transferénsia Públika $6.000.000,00 no Kapitál Dezenvolvimentu $700.000,00, enkuantu ba kategoria Kapitál menor la prevé orsamentu.
Montante orsamentu 2025 ho totál $9.016.593,00 ne’e sei finansia programa prioridade ida maka programa Funsionamentu no Dezenvolvimentu Institusionál.
Marka prezensa iha audiénsia públika ho Komisaun A, Komisáriu sira, Diretór-Jerál, kargu diresaun no kargu xefia sira.