Orsamentu Ba MOP Ho Montante US$ 𝟐𝟕𝟎.𝟕𝟓𝟕.𝟑𝟓𝟎 Aprovadu Iha Debate Espesialidade

Dili, Parlamentu Nasionál aprova orsamentu US$ 270.757.350 ba Ministériu Obras Publika-MOP iha faze espesialidade, ho votu afavór 43, kontra 15 no abstensaun 5, iha Plenária estra-ordinaria Parlamentu Nasionál, loron 15, fulan-Outubru, tinan 2024,

Iha debate espesialidade ba Orsamentu Jerál Estadu – OJE 2025, Deputadu sira husi bankada opozisaun aprezenta proposta alterasaun rua, maka proposta númeru 58 no proposta númeru 65, Proponente  ba proposta alterasaun maka Deputadu Antoninho Bianco, Deputada Maria Ana Bela Savio, Deputadu Dario Madeira, Deputada Sancha Paixão Bano no Deputada Nurima Alkatiri. 

Tuir proponenta Deputada Maria Ana Bela Savio hatete proponente sira aprezenta proposta númeru 58 atu halo redusaun ba orsamentu ho montante US$ 67.319 husi totál orsamentu ho montante US$73.811.784 ne’ebé aloka iha Programa estradas no pontes ho razaun katak orsamentu estrada Lospalos-Iliomar ho montante US$ 67.319  hasai tiha, la presiza dupla ba projetu iha faze implementasaun ne’ebé finansia husi orsamentu imprestimu ADB nian, tanba estrada refere la’os nahe alkatraun, ne’ebé presiza aloka orsamentu ba halo manutensaun, iha livru dezenvolvimentu orsamentais por programa ne’ebé nia atividade no alokasaun orsamentu hanesan US$21.975 no iha livru planu asaun anual atividade hanesan orsamentu manutensaun la hanesan, signifika atividade ida ne’e la presiza.

Enkuantu Deputadu Dario Madeira hatete proposta númeru 65, husu atu halo redusaun ho montante US$165.077  husi programa estrada no pontes ho razaun katak orsamentu iha tinan 2024 aloka US$198.361 ezekuta de’it US$177.407 koresponde de’it 89,40%, hakarak hatene iha tinan 2024 produs normas teknikas hira ka padraun ruma? Oinsa kualidade obra ba Estrada no ponte sira tuir duni padraun internasionál ka lae? haree ba kapasidade ezekusaun iha tinan ida ne’e la konsege ezekuta hotu no kualidade obra la di’ak no la iha justifikasaun klaru, nune’e proponente propoin ba tinan 2025 aloka orsamentu US$200.000 de’it, nune’e hamenus US$165.077 husi proposta US$365.077.

Hatan ba proposta númeru 58 no 65 ne’e Ministru Obras Publika Samuel Marçal  hatete Governu  rejeita proposta halo redusaun ba orsamentu,tanba orsamentu tau ona iha programa, no orsamentu refere tau atu selu retensaun no selu tékniku sira  atu halo estudu ba estrutura rai iha teritóriu laran.