Parlamentu Nasional, 18 de Novembro 2024 – Orsamentu ba Ministériu Petróleu no Rekursu Minerál (MPRM) ho montante US$ 47.239.935 aprovadu iha debate espesialidade OJE 2025, iha Plenáriu Parlamentu Nasionál, loron 18, fulan-Novembru, tinan 2024, ho votu afavór 42, kontra 4 no abstensaun 18.
Iha debate espesialidade OJE 2025, Deputadu sira husi bankada opozisaun aprezenta proposta alterasaun ida maka proposta númeru 18.
Deputadu proponente, Antoninho Bianco, hateten sira aprezenta proposta númeru 18 atu halo redusaun ba orsamentu ho montante US$ 236.129 husi dotasaun inisiál US$ 1.399.684 ne’ebé alokadu ba programa Funsionamentu no Dezenvolvimentu Institusionál tanba iha audiénsia ministériu la fornese informasaun klara kona-ba razaun aumenta orsamentu ba programa ida ne’e tanba iha tinan 2024 ministériu aloka ona orsamentu ho montante US$ 1.163.555 ba programa hanesan.
Hatan ba proposta referida, Ministru Petróleu no Minerál, Francisco da Costa Monteiro, husu ba proponente sira atu retira proposta ne’e hodi mantéin valór orsamentu ne’ebé alokadu ona ba programa Funsionamentu no Dezenvolvimentu Institusionál, tanba kestaun prinsipál rua katak ministériu ne’e iha papél importante tebes hodi asegura rendimentu boot ba Estadu Timor-Leste no kontribuisaun ba ekonomia enjerál.
Governante ne’e akresenta aleinde ba programa no planu ne’ebé iha ona, Ministériu mós foka ba kapasitasaun rekursu umanu, liuliu formasaun profisionál sira, tanba ne’e maka halo aumentu orsamentu hodi aloka ba programa dezenvolvimentu kapasidade institusionál atu alkansa objetivu ne’ebé iha.
Maske Ministru Petróleu no Rekursu Minerál husu atu retira proposta ne’e, maibé proponente sira mantéin hodi submete ba votasaun ho rezultadu afavór 21, kontra 38 no abstensaun 4, nune’e proposta 18 la pasa.
Iha diskusaun OJE 2025 ba MPRM, nafatin ho prezensa Primeiru-Ministru, Kay Rala Xanana Gusmão, Vise-Primeiru-Ministru Área Ekonómika, Vise-Primeiru-Ministru Área Sosiál no membru Órgaun Ezekutivu sira hotu, ne’ebé akompaña mós husi audiénsia.