Debate espesialidade ba loron dalima (5), kontinua hetan partisipasaun máximu hosi Exelénsia Primeiru Ministru, Vise-Primeru Ministru na’in rua, Ministra MSSI, Vise-Ministru Assuntu Parlamentarés, membru Governu hotu
Parlamentu Nasional, 18 Novembru 2024 – Debate orsamentu tama ona ba loron lima (5) ne’ebé kontinua ho debate ba aprovasaun orsamentu hosi Ministériu Solidariedade Sosiál no Inkluzaun ho totál montante US$26.188.602.
Iha sesaun plenária OJE 2025, háhu kedan ho leitura ba proposta sira hosi proponent ne’ebé hato’o hosi Sekretaria Meza no hafoin ida ne’e Prezidénte Parlamentu Nasionál Fernanda Lay, fó tempu ba bankada proponente sira atu halo esklaresimentu ba proposta ne’ebe mai hosi bankada opozisaun sira.
Tuir deklarasaun proponente ba proposta alterasaun, Deputadu Antonino Bianco, hatete proposta ne’e atu halo Eliminasaun ba programa Inkluzaun Sosiál, no halo aditamentu hodi apoiu ba iha Ministeriu Saúde, hodi reforsa servisu Saúde nian.
Hatán ba kestaun ne’e bankada Governu, Deputada Maria Anabela Sávio, hatete katak iha audénsia públika, Ministra MSSI la ko’alia atu aumenta osan ba iha Ministériu Saude, MSSI hatete katak programa Inkluzaun Sosiál, atu apoiu programa Bolsa da Maĕ, no apoiu ba inan isin rua sira no labarik 0 – tinan 1.
Hosi total Orsamentu US$26.188.602, ne’ebé aloka ba MSSI fahe ba kategoria Saláriu no Vensimentu US$3,982.088, Bens Servisu US$10,744.951, Transferĕnsia Públika 9,501.672, Kapitál Menor US$500,000 no Kapitál Dezenvolvimentu US$ 1.459.891.
Rezultadu Votasaun Proposta No 38 ba MSSI la passa ho votu Afavor 19, kontra 39, abstensaun 5, hafoin ne’e kontinua kedan ba votasaun OJE 2025 MSSI nian ho votu Afavór 43, Kontra 19, Abstensaun 1, nune’e OJE 2025 MSSI nian Aprovadu ho totál montante US$26.188.602.
Debate espesialidade ne’e, hetan partisipasaun máximu hosi Exelénsia Primeiru Ministru, Vise-Primeru Ministru na’in rua, Ministra MSSI, Vise-Ministru Assuntu Parlamentarés, membru Governu hotu no audénsia sira.