Vise-Ministru Asuntus Parlamentares SE, Sr. Adérito Hugo da Costa, ofisialmente loke atividade Desportiva Torneiu Taxa Rotativa Betano Cup ba tinan 2025. Serimónia abertura ne’e hala’o iha Postu Administrativu Betano, Munisipiu Manufahi.
Torneiu Taxa Rotativa Betano Cup hahu iha tinan 2024, no ba tinan ida ne’e Torneiu Taxa Rotativa Betano Cup realiza ba dala rua (2) no kompete husi klubu hamutuk Sanulu Resin Rua (12) ne’ebe maka eziste iha Suku Betano ho objetivu ida atu be’ele promove telentu desportiva foin sae sira nian no kria relasaun diak entre komuidade sira iha suku Betano atu nafatin mantem Paz no estabilidade iha rai ida ne’e.
Iha diskursu S.E Vise-Ministru ba Asuntus Parlamentares, Sr Adérito Hugo da Costa hateten “Ho laran haksolok tebes hodi lori IX Governo nia naran hakarak agradese ba Komisaun Organizadora, ne’ebé ho inisiativa rasik hodi kria atividade desportiva ida ne’e, atu bele ajuda Governo ida ne’e hodi alkansa objetivu mais prosperu ba iha atividades desportivu rai ida ne’e nian”.
VMAP mós husu atu eventu sira hanesan ne’e, labele para deit iha tinan ida ne’e maibé tenke kontinua nafatin hodi dezenvolve desportu iha Timor-Leste, liu liu iha rai Manufahi.
Serimónia ne’e marka prezensa masimu husi figura importante sira, inklui komandante PNTL Munisipiu Manufahi, komandante F-FDTL Posto Betano, Chefe Suku Betano no komudade suku Betano.