Vise-Ministru ba Asuntus Parlamentares (VMAP), S.E Adérito Hugo da Costa akompanha Primeiru-Ministru S.E Kay Rala Xanana Gusmão halao enkontru ho Grupu Traballu Prosesu Rekonsiliasaun Timoroan (GT-PRT) iha Centro Nacional Chega (CNC), Balide.
Dili, 08 de Abril 2025 – Vise-Ministru ba Asuntus Parlamentares (VMAP), S.E Adérito Hugo da Costa hola partisipa iha enkontru ida ne’ebé lidera husi Primeiru-Ministru S.E Kay Rala Xanana Gusmão, Grupu Traballu Prosesu Rekonsiliasaun Timoroan ne’ebé realiza iha loron 8 fulan Abril tinan 2025.
Objetivu husi enkontru ida ne’e hodi fó orientasaun kona-ba polítika Rekonsiliasaun ba Grupu Traballu Prosesu Rekonsiliasaun Timoroan (GT-PRT).
Durante enkontru ne’e Ekipa hosi Grupu Traballu Rekonsiliasaun mós hamutuk ho Centro Nacional Chega (CNC) aprezenta dokumentu rua ba kona-ba rekonsoliasaun entre Timoroan ho Timoroan bá Primeiru-Ministru (PM), Kay Rala Xanana Gusmão.
Nune’e Sr. Joaquim Russo Fonseca ne’ebé nu’udar portavoz Grupu refere hateten katak dokumentu rua ne’ebé aprezenta ne’e hanesan konseitu ida hodi halo rekonsiliasaun entre Timoroan sira.
“Dokumentu rua ne’ebé ami aprezenta hanesan nota konseitu ida kona-ba oinsa rekonsiliasaun entre Timoroan sira, no dokumentu seluk mak termu referénsia ba prosesu rekonsilisaun ne’ebé ko’alia kona-ba tekniku ne’ebé mak tenki foti iha prosesu ida ne’e hodi fó fatin ba Timoroan sira atu bele fó dame ba malu”, dehan Sr. Joaquim.
Tuir istoria Iha Inisiu tinan 2025, CNC estabele ona Grupu Traballu Prosesu Rekonsiliasaun Timoroan (GT-PRT), no rekonsiliasaun ne’e nu’udar prosesu no mekanizmu ne’ebé atu estabelese hodi fasilita Prosesu Rekonsiliasaun Timoroan hatur iha Objetivu ida atu apoiu simu malu no reintegra ema sira ba sira nia komunidade relasiona ho diverzensia politika pasadu, aktu kirminal no non-kriminal ne’ebé mak sira komete iha kontestu konflitu politiku politika nian iha Timor-Leste entre period 25 Abril 1974 to’o 25 Outubro 1999.
Objetivu refere kontinua pertinente atu uza nu’udar objetivu ba Prosesu Rekonsiliasaun Timoroan ne’ebé mak Estadu no Governo Timor-Leste pretende atu implementa iha tinan hirak tuirmai.
Iha enkontru ne’e mós Primeiru-Ministru, S.E Kay Ralla Xanana Gusmão fó ideia kona-ba dokumentu ne’ebé grupu triballu prepara hodi kompleta saida mak seidauk inklui iha dokumentu ne’e. “Ha’u haree dokumentu ne’e pozitivu, no agradese ba esforsu sira ne’ebé grupu traballu halo, no kompromete apoia intermu pesoal no nu’udar Xefe Governu IX Governu ba prosesu rekonsoliasaun ida ne’e” dehan PM Xanana.
Enkontru ne’e rasik hetan partisipasaun maximu husi Membru Governo sira, sosiedade balun inklui konvidadus internasional balun.