Perfil Vice-Ministro dos Assuntos Parlamentares
Adérito Hugo da Costa agora daudaun kaer knaar nu’udar Vise-Ministru ba Asuntu Parlamentár iha Ministériu Prezidénsia Konsellu Ministrus husi IX Governu Konstitusionál, ba mandatu 2023-2028. Antes ne’e, eleitu nu’udar Deputadu ba lejizlatura lima , primeiru iha 2007, no bainhira re-eleitu iha eleisaun jerál parlamentare hirak tuir mai tuir inklui iha última eleisaun parlamentar iha 2023. Asume kargu nudar Vise-Prezidente Parlamentu Nasionál Timor-Leste nian iha 30 Jullu 2012, no depois eleitu nu’udar Prezidente Parlamentu iha 5 Maiu 2016, mandatu ne’ebé remata iha Setembru 2017.
Durante iha mandatu nu’udar Prezidente Parlamentu Nasionál, Adérito Hugo da Costa halo reforma bo’ot ida iha Parlamentu Nasionál, hodi harii Komisaun Eventuál ida ne’ebé kompostu husi deputadu husi partidu hotu. Reforma ne’e inklui elaborasaun ba orgánika foun Parlamentu nian, introdusaun ba mekanizmu sira ne’ebé garante efikásia no efisiénsia iha jestaun administrasaun parlamentár, no mós gabinete auditória interna ida ne’ebé inovativu hodi akompaña jestaun finanseira Parlamentu nian. Komisaun ne’e mós, ba dala uluk iha istória Parlamentu Nasionál, prepara Planu Estratéjiku ba tinan lima, ne’ebé prevé asaun estruturante sira ne’ebé sei lori ba afirmasaun Parlamentu Nasionál nu’udar instituisaun ida ne’ebé modernu, transparente, no liuliu besik liu ba sidadaun sira.
Antes hetan eleisaun nu’udar Vise-Prezidente iha 2012, Adérito Hugo da Costa serbisu tinan lima nu’udar portavós ba Bankada CNRT, husi 2007 to’o 2012. CNRT mak partidu Governu nian ne’ebé lidera husi S. Ex.ª Kay Rala Xanana Gusmão (ex-Prezidente Repúblika Demokrátika Timor-Leste, ne’ebé mós serbisu nu’udar Primeiru-Ministru iha IV no V Governu Konstitusionál Timor-Leste nian. Adérito Hugo da Costa sai Membru ba Komisaun Finansas Públikas durante tinan 9 e Prezidente ba Komisaun B Parlamentu Nasional ba Asuntu Defeza, Seguransa no Relasaun Internasional.
Nia mós lidera reprezentasaun husi Organizasaun Globál Parlamentár Kontra Korrupsaun (GOPAC) iha Timor-Leste nu’udar Prezidente Konsellu Administrasaun, no sai mós Membru Konsellu Konsultivu ba Apoiu IRI nian ba Formasaun Lideransa Juventude.
Nia esperiénsia internasionál inklui: lidera delegasaun Deputadu Timor-Leste nian ne’ebé partisipa nu’udar observadór internasionál iha eleisaun prezidensiál Giné-Bisau nian iha 2014; partisipa iha Konferénsia Parlamentár Internasionál kona-ba Kresimentu ba Dezenvolvimentu, ne’ebé organizadu husi Asosiasaun Parlamentár Commonwealth iha Londres, iha 2014; hola parte iha equipa Parlamentár oradór sira iha programa formasaun inisiasaun ba Membru foun sira husi Hluttaw (Parlamentu Myanmar nian, ne’ebé iha Membru 657); partisipa nu’udar observadór iha eleisaun estadu oioin iha Austrália; no mós halo parte iha estudu komparativu oioin. (Kontinua…)
|
Iha ámbitu estrutura partidária CNRT nian, Adérito da Costa ezérse knaar nu’udar líder iha Komisaun Juridisaun nian husi 2011 to’o agora, no ativu tebes iha atividade oioin partidu nian. Durante períodu luta ba independénsia, Adérito da Costa envolve iha movimentu klandestinu oioin, no luta ba independénsia durante okupasaun indonézia ne’ebé brutal liu tinan 24. Nia sai vítima operasaun militár indonézia nian, hetan tiru husi munisaun tolu iha 1977. Nia partisipa mós iha manifestasaun 12 Novembru 1991 no sai sobrevivente ida husi Masakre Santa Cruz. Nia sai jornalista profisionál husi 1993, durante okupasaun, to’o restaurasaun independénsia Timor-Leste nian iha 2002. Depois referendu ne’ebé organizadu husi ONU iha 30 Agostu 1999, nia lidera grupu timoroan ida ne’ebé harii no halo funsiona “Timor Post”, ne’ebé to’o ohin loron mak jornal diáriu líder ida iha imprensa nasionál. Adérito da Costa iha esperiénsia tinan sanulu-resin-haat nu’udar jornalista. Iha 2006, nia hetan nia Lisensiatura iha Siénsia Polítika iha Universidade Nasionál Timor Lorosa’e. Nia kaben ho Aurélia da Costa no iha oan-feto haat: Estefânia, Jéssica, Tatiana no Kayla.
|
