Vise-Ministru Assuntus Parlamentares, S.E. Aderito Hugo, partisipa enkontru ho delegasuan membru Parlamentu Uniaun Europeia ne’ebé lidera husi Xefe Delegasaun, Francisco Asis, iha Sentru Konvensaun Dili (CCD-Dili). Foto/©MediaGVMAP
Dili, 16 Setembro 2025 – Vise-Ministru ba Asuntus Parlamentares SE. Adérito Hugo da Costa hamutuk ho membru Governo sira akompaña Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, S.E Francisco Kalbuadi Lay realiza enkontru ofisiál ho delegasaun Asembleia Parlamentár Uniaun Europeia iha Centro de Convenções de Díli (CCD), ho objetivu diskute kooperasaun estratéjika ba dezenvolvimentu nasionál.
Vise-Primeiru-Ministru, S.E Francisco Kalbuadi Lay delega Vise-Ministru ba Asuntus Parlamentares no Sekretária Estadu ba Igualidade, hodi simu bainaka sira hanesan Xefe Delegasaun Asembleia Parlamentár Uniaun Europeia no Membru komitíva Parlamentu Europeia molok tama ba fatin serimónia.
Reuniaun ne’e foka ba asuntu importante sira ne’ebé aliña ho prioridade dezenvolvimentu nasionál Timor-Leste, inklui estratéjia ba hametin kooperasaun bilaterál iha futuru.
Relasaun entre Timor-Leste ho Uniaun Europeia establese tiha ona dezde tempu luta ba ukun rasik aan, kria fundamentu ida ne’ebé forte ba kooperasaun longu-prazu. Parseiru estratéjiku ne’e kontinua evolui atu responde ba nesesidade dezenvolvimentu atuál.
Kooperasaun ne’e kontribui direitamente ba kapasidade nasionál Timor-Leste iha área kritiku sira, kria impaktu pozitivu ba populasaun jerál.
Uniaun Europeia fó apoiu ba setór agrikultura, edukasaun, no saúde. Apoiu ne’e inklui mós rekuperasaun infraestrutura, fortalesimentu institusionál, no promosaun governasaun ne’ebé di’ak. Kolaborasaun sira ne’e sai hanesan fundamentu ba relasaun amizade entre nasaun rua no kontribui ba dezenvolvimentu nasional no integrasaun internasionál.
Enkontru ne’e reprezenta pasu importante ida iha relasaun diplomátika entre Timor-Leste ho Uniaun Europeia, demonstra kontinuidade apoiu internasionál ba dezenvolvimentu nasionál no integrasaun Timor-Leste iha komunidade internasionál. ©MediaGVMAP
