Parlamento Nacional 21 Outubro 2024 – Ministériu Prezidénsia Konsellu Minsitru – MPCM, ne’ebé reprezenta hosi Exelénsia Vise-Ministru Assuntu Parlamentares, Señor Dr Adérito Hugo da Costa aprezenta proposta programa no orsamentu OJE 2025 hamutuk $4.956.893,00 iha Audénsia Públika ho Komisaun A trata Assuntu Konstitusionál no Justisa, Parlamentu Nasionál.
MPCM aposta ninia programa iha tinan 2025, maka programa Funsionamentu no Dezenvolvimentu Institusionál no programa Polítika Estratéjika Nasionál ho orsamentu ne’ebé kobre ba Saláriu no Vensimentu ho totál $2.929.942, Bens no Servisu ne’ebé totál $2.026.951.
Enkuantu Kapitál Menór, Transferénsia Públika no Kapitál Dezenvolvimentu la preve iha OJE tinan 2025, tanba KM, TP no KD sei aloka ba iha Sekretaria Estadu Komunikasaun Sosiál – SEKOMS, ne’ebé iha tinan 2025 ho ninia organika rasik.
Ezekusaun MPCM nian iha portál transparénsia ba loron 21 fulan-Outubru atinji ona 57,4%, maibé iha ezekusaun sistema free balance MPCM nian rasik, atinji ona 69.1%.
Bainhira halo komparasaun entre OGE 2024 ho OGE 2025 ba MPCM maka OGE 2025 sofre redusaun ho montante $10.317.544, tanba tinan 2025 orsamentu SEKOMS la integra ona iha MPCM no iha audiénsia públika MPCM pedidu dotasaun adisionál maibé la hetan aprovasaun, aleinde ne’e MPCM la mensiona kona-ba estimativu forsa traballu ba tinan 2025.
Ministériu Prezidénsia Konsellu Ministru iha totál forsa traballu atuál kompostu husi Funsionáriu Permanente 59, Kazuál/Kontratadu 26, Ajénte Administrasaun 11, Kargu Diresaun no Xefia 19, Funsionáriu Nomeasaun Polítika Gabinete MPCM 11, Funsionáriu Nomeasaun Polítika Gabinete Assuntu Parlamentár 9, Assesór Nasionál 15 no Assesór Internasionál 8
Iha audiénsia públika ho Komisaun A, MPCM ne’ebé reprezenta hosi Sua Exelénsia Vise-Ministru no akompañia hosi Xefe Gabinete, Diretór Jerál, Diretór Finansas no Assesor sira.