Komisaun A Parlamentu Nasionál ne’ebé trata asuntu Konstitusionál no Justisa halo audiénsia públika ho Komisaun Anti Korupsaun (CAC), iha Kinta-feira, loron 24, fulan-Outubro tinan 2024, iha sala konferénsia Parlamentu Nasionál.
Iha audiénsia públika ne’e, Vise-Prezidente Komisaun A, Deputadu António Verdial, ne’ebé lidera audiénsia fó biban ba Komisáriu CAC, Rui Pereira, hodi aprezenta proposta OGE 2025 no progresu taxa ezekusaun orsamentu 2024 nian, antes fó tempu ba Deputadu sira Komisaun A nian hodi koloka kestaun sira liga ho OGE ne’ebé alokadu ba CAC iha tinan ne’e no tinan oin.
Iha aprezentasaun, Komisáriu Rui Pereira hatete OGE 2024 ne’ebé alokadu ba CAC ho montante $2.332.135,00 ho ninia taxa Ezekusaun iha portál transparénsia loron 24, fulan-Outubru atinji ona 36% no hein katak to’o finál Dezembru bele atinji 60% resin, enkuantu proposta OGE ba 2025 ho montante 1.925.935,00 ne’ebé inklui ona orsamentu adisionál ne’ebé Komisaun Revizaun Orsamentál (CRO) aprova.
Wainhira halo komparasaun entre OGE 2024 ho OGE 2025 maka OGE 2025 ba CAC sofre redusaun ne’ebé sei aloka ba kategoria Saláriu no Vensimentu ho montante $1.428.948,00, Bens no Servisu Korente ho montante $496.987,00 enkuantu ba kategoria Kapitál Menor, Transferénsia Públika no Kapitál Dezenvolvimentu la prevé orsamentu.
Relasiona ho taxa ezekusaun 2024 nian ne’ebé mínimu, Komisáriu CAC ne’e explika katak ezekusaun mínimu tanba halo de’it ba kategoria saláriu no vensimentu enkuantu bens no servisu korente vakum durante tinan ida fulan lima relasiona ho vakatura estrutura CAC, tanba kualker despeza Estadu tenki asinadu husi Komisáriu.
Iha OGE 2025, CAC aprezenta pedidu adisionál ho montante $500.000,00 resin maibé Komisaun Revizaun Orsamentál (CRO) aprova de’it $242.000,00. Husu ba Komisaun A atu halo proposta adisionál ba CAC iha debate OGE hodi bele apoia servisu iha instituisaun ne’e.
CAC iha totál forsa traballu atuál hamutuk 116 ne’ebé kompostu husi Komisáriu no funsionáriu sira hotu ho programa prioridade rua maka Asesu Justisa no Funsionamentu no Dezenvolvimentu Institusionál.
Marka prezensa iha audiénsia públika ne’e, Adjuntu Komisáriu sira no direjente máximu CAC nian.