Vise-Ministru ba Asuntus Parlamentares-VMAP, Sua Excelênsia Sr. Adérito Hugo da Costa Congratula Xefe Suku Bebonuk no komunidade tasi Ibun bebonuk inklui PAM Baucau no Komunidade iha Merkadu Baukau iha plenária segunda-feira semana ne’e nian.
Hafoin deputadu sira hato’o Deklarasaun Politika no intervensaun diversa kona-ba asuntu sira ne’ebé popular iha Timor-Leste hanesan Evikasaun no asuntu social seluk tan. Asuntu Eviksaun ne’ebé Sekretáriu Estadu ba Asuntu Toponímia no Organizasaun Urbana-SEATOU halo iha kapital Dili sai polemika bo’ot ba komunidade no povo Timor-Leste.
Iha tempu hanesan Xefe Suku Bebonuk ho nia boa vontade rasik tun direta ba halo dialogo ho komunidade sira kona ba eviksaun ba komunidade ne’ebé hela iha fatin risku ka okupa fatin públiku, husi dialogo ne’e, konsege influensia komunidade sira ne’ebé hela iha fatin risku, ikusmai komunidade balun voluntariamente deside muda sai husi fatin refere.
“Mai ita parabéns no basa liman ba Xefe Suku Bebonuk no komunidade sira iha parte bebonuk, ita apresia ba sira nia boa vontade rasik, sira voluntariamente muda husi fatin ne’ebé espasu publiku no risku ba sira atu hela” dehan VMAP
Aleinde komunidade bebonuk, komunidade iha Munisipiu Baucau ne’ebé okupa iha merkadu nian mós voluntariamente sobu sira nia fatin hodi muda ba fatin seluk
Nune’e S.E VMAP hatete “Hau congratula mós PAM Baucau ho nia komunidade sira, liliu komunidade hirak ne’ebé hela iha merkadu laran sira iha iniciativa rasik muda sira nia sasan, sobu sira nia sasan hodi ses husi fatin publiku refere”.
Governu Timor-Leste, liuhusi Sekretariu Estadu Asuntu Toponimu no Organizasaun Urbanu (SEATOU), implementa ona kampaña ida atu evakua ema husi fatin públiku no área sira ne’ebé konsidera iha risku. Kampaña ida-ne’e ho objetivu atu haree ba sidade sira no atividade ekonómika sira ne’ebé la hetan lisensa atu hadi’a orden públiku no seguransa.