Dili, 11 de Fevereiru 2025 – Membru Deputadu Parlamentu Nasionál hato’o preokupasaun kona-ba interupsaun eletrisidade ne’ebé akontese iha kapitál, Dili, no área balun seluk tan.
Deputadu Cedelizia Faria dos Santos subliña katak, eletrisidade ne’ebé kontinua mate ne’e prejudika tebes, komisaun C Parlamentu Nasional ba hala’o fikalizasaun iha Ministériu Finansas, liuliu ba atendimentu públiku iha Ministériu Finansas. Tuir nia, sistema eletróniku barak mak presiza eletrisidade atu funsiona, maibé ho interupsaun ne’e, serbisu iha Ministériu Finansas hetan difikuldade. “Eletrisidade mate nunka hotu ne’e afeta maka’as lala’ok serbisu sira iha ministériu,” dehan Cedelizia iha reuniaun plenária PN nian.
Deputada husi Bankada Parlamentar CNRT ne’e, husu mós ba Governu atu buka kedas solusaun emerjénsia no mós husu ba Governu tau atensaun ba kestaun ida ne’e, karik Prezidénte Eletrisidade Timor – Leste (EDTL) laiha kapasidade, di’ak liu husu rezigna a’an de’it.
Iha parte seluk, Reprezentante Povu iha uma fukun Parlamentu Nasionál (PN) katak, iha Suku Comoro, ne’e mós hato’o buat ne’ebé hanesan, haktuir katak, problema eletrisidade mate ne’e prejudika tebes komunidade, liuliu sira ne’ebé depende ba eletrisidade ba nesesidade lor-loron nian, tanba eletrisidade mate-lakan estraga hotu sira nia sasan elektróniku barak.
Iha okaziaun ketak, Deputadu Óscar Lima destaka mós kondisaun ne’ebé hanesan iha Munisípiu Ermera, iha ne’ebé eletrisidade mate durante loron haat tuituir malu. Nia husu ba Governu, liuliu EDTL atu buka kedas solusaun ba problema ne’e. “Ita tau ema ida halo jestaun ba eletrisidade, presiza ema matenek, se kuandu ita nia ema laiha, bele kontrata ema iha rai liur bele halo jestaun, tanba ita lakon osan barak tebes ba eletrisidade.
Povu sira ne’ebé kontinua afetadu hein hela atu rezolve problema eletrisidade mate. Tuir sira, ho jestaun ne’ebé la’o hela, dispozitivu eletróniku barak maka hetan estragu no serbisu hetan perturbasaun. Deputadu sira seluk husi PN, Anacleto Freitas, subliña mós katak iha área balun hanesan Postu Administrativu Uatulari, eletrisidade mate durante fulan tolu resin ona. Nia espera, Governu ka parte relasionadu sira halo kedas avaliasaun ba kauza sira husi problema ne’e.
Iha situasaun ida ne’ebé urjente ba beibeik, deputadu/a sira husu ba Governu atu foti asaun lalais no desizivu, no mós dezenvolve pasu sira ba tempu naruk hodi garante fornesimentu eletrisidade ne’ebé estavel iha rejiaun tomak, liuliu iha sentru atendimentu públiku no komunidade sira. Remata